बाँके । कुनै समयमा १ लाख ५ हजार ऋण तिर्न नसक्ने अवस्थामा पुगेका बाँके सीतापुर ३ ‘के’ गाउँका ३८ वर्षीय लालबहादुर सुनार पाँच वर्षमै करोडपति बन्दै छन् । उनी सामान्य खेती किसानी अर्थात् च्याउ खेतीबाट करोडपति बनेका हुन् ।
उनले अहिले बाह्रै महिना च्याउ खेती गरिरहेका छन् । दुई वर्ष विदेशी माटोमा पसिना बगाएर आएका उनले ६० हजार लगानीबाट च्याउ खेती सुरुवात गरेका हुन् । उनी अहिले दैनिक १ लाख रुपैयाँको च्याउ बेच्दै आएका छन् ।
व्यावसायिक च्याउ खेती फस्टाएपछि उनी पश्चिमकै ठूला च्याउ उत्पादक बनेका हुन् । गत वर्ष उनले दैनिक ३ क्विन्टलसम्म च्याउ बेचे । यो वर्ष दैनिक ५ क्विन्टल बिक्री गर्ने लक्ष्य लिएर च्याउ लगाउँदै छन् । वर्षे र हिउँदे च्याउले बजार पाएपछि आउँदो वर्ष उनको आम्दानी १ करोड नाघ्ने भएकोछ भने योसँगै उनी करोडपति बन्दैछन् ।
३० असार २०७३, ९।००, कान्तिपुर
वि.सं.२०७३ असार ३० बिहीवार १३:३८ मा प्रकाशित