काठमाडौ । हकप्रद सेयर निष्काशन गर्नेक्रम जारी रहेको पछिल्लो अबधिमा पुँजी बजारको नियामक निकाय नेपाल धितोपत्र बोर्डमा हकप्रद सेयर निष्कासन गर्न विभिन्न १४ आवेदन परेका छन् ।
आवेदन परेका यी सबै कम्पनीले अनुमति पाएपछि ४ अर्ब ५१ करोड ९२ लाख रुपैंया भन्दा बढि अर्थात् ४ करोड ५१ लाख ९२ हजार भन्दा बढि कित्ता हकप्रद सेयर बजारमा आउनेछ ।
चुक्ता पुँजी बढाउन हकप्रदको बाटो रोजेर धितोपत्र बोर्डमा निवेदन दिनेमा अधिकांश बैंक तथा फाइनान्स कम्पनी देखिएका छन् । यसबाहेक जलविद्युत, बिमा र लघुवित्त कम्पनी पनि देखिएका छन् ।
हकप्रद निष्कासन अनुमतिका लागि पाइपलाइनमा रहेका कम्पनीहरूमा नेरुद्धे लघुवित्त विकास बैंक, देवः विकास बैंक, नमस्ते वित्तीय संस्था, मन्जुश्री फाइनान्स, सगरमाथा फाइनान्स, सिद्धार्थ इन्सुरेन्स रहेका छन् ।
यस्तै कैलाश विकास बैंक, कञ्चन डेभलपमेन्ट बैंक, नेको इन्सुरेन्स, सप्तकोशी डेभलपमेन्ट बैंक, ललितपुर फाइनान्स, अपि पावर कम्पनी, कामना विकास बैंक र सेन्ट्रल फाइनान्स रहेका छन् ।
नेरुद्धे लघुवित्त र देवः विकास बैंकले ५० प्रतिशत हकप्रद ल्याउने तयारी गरेका हुन् भने नमस्ते वित्तीय संस्था र नेको इन्सुरेन्सले एक सय प्रतिशत, सिद्धार्थ इन्सुरेन्सले २५ प्रतिशतले ल्याउन लागेको हो । यसैगरी, अपि पावरले दुई सय प्रतिशत हकप्रद ल्याउन अनुमति मागेको छ ।
विशेष गरी राष्ट्र बैंकले चुक्ता पुँजी वृद्धि गर्न बैंक तथा वित्तीय संस्थालाई निर्देशन दिएपछि धेरैले पुँजी बढाउने एउटा गतिलो आधार हकप्रद शेयरलाई बनाउँदा बजारमा यसको चाप बढेको छ ।
प्रकाशित मितिः २०७३ कार्तिक २१
वि.सं.२०७३ कात्तिक २१ आइतवार १३:५५ मा प्रकाशित
