काठमाण्डौं । भारतको राजधानी नयाँदिल्लीमा दिपावलीमा पड्काइएका पटाकाहरुको कारण प्रदुषणको मात्रा बढेर मिटरले समेत नाप्न नसक्ने भएपछि त्यहाँको राज्य सरकारले विद्यालयहरु बन्द गराएको छ भने स्थानीयलाई घर बाहिर ननिस्कन आग्रह गरेकोछ ।
प्रदुषण बढेर खतरनाक स्थितिमा पुगेपछि दिल्ली सरकारका मुख्य मन्त्री अरविन्द केजरीवालले मन्त्रिपरिषदको आपतकालीन बैठक बोलाएका छन् । प्रदुषणको मात्रा बढेर मानिसहरुमा आँखा पोल्ने र सास फेर्न गाह्रो हुने समस्या देखिएको छ । मौसम विभागका अधिकारीहरुले घर बाहिर ननिस्कन वा निस्कनैपर्ने अवस्था आए विशेष प्रकारको मास्क प्रयोग गर्न सल्लाह दिएका छन् ।
वातावरणविदहरुले दिल्लीमा अहिलेको धूप र अगरबत्ती, कागज, पातपतिङ्गर नजलाउन, ट्राफिक लाइटमा रोकिँदा गाडीहरुको स्टार्ट बन्द गर्न, गाडीहरुमा जोर–बिजोर प्रणाली लागू गर्न र सडकमा पानी छर्किन सुझाव दिएका छन् ।
एजेन्सीको सहयोगमा, २१ कार्तिक २०७३, १।००
वि.सं.२०७३ कात्तिक २१ आइतवार १४:१७ मा प्रकाशित
