भोजपुर सदरमुकाममा आइतबार ५ बजेतिर लागेको आगलागीबाट भोजपुर सदरमुकाम सखाप भएको छ । भोजपुर सदरमुकामको मिलन ज्वेलर्सबाट आगलागी सुरू भएको थियो ।
पसलमा रहेको ग्यास पट्केर आगलागी भएको बताइएको छ । आगलागीबाट पाँच घर पूर्ण रूपले जलेर नष्ट भएका छन् भने ८ घरमा आंशिक रूपमा क्षति भएको जिल्ला प्रहरी कार्यालय भोजपुरका प्रहरी निरिक्षक राधाप्रसाद पराजुलीले बताए ।
आगलागीबाट भएको क्षतिको पूर्ण विवरण भने आउन सकेको छैन् । आगलागीमा बद्री राणा, लालबहादुर विक र गणेश श्रेष्ठको घर नष्ट भएको बताईएको छ । हाल आगो नियन्त्रणमा आएको छ ।
आगलागी नियन्त्रणका लागि स्थानीयवासी, प्रहरी, सेना खटिएका थिए । वारूण यन्त्रको समेत प्रयोग गरिएको थियो । जस्ता पाताको छानो, पुराना र लहरै बस्तीका कारण आगो नियन्त्रणमा समस्या परेको हो । झुरुप्प बस्तीका कारण आगलागी हुँदा भोजपुर सदरमुकाम सधै जोखिममा रहँदै आएको छ ।
तस्विरः राजेन्द्र राईको फेसबुकबाट
प्रकाशित मितिः २०७३ मंसिर ५
वि.सं.२०७३ मंसिर ५ आइतवार १९:१४ मा प्रकाशित
