काठमाडौ । हिमालयन जेनेरल इन्स्योरेन्स कम्पनी लिमिटेडले १६६.६७ अर्थात एक बराबर एक दशमलव ६६६७ को अनुपातमा हकप्रद सेयर निष्काशन गर्ने भएको छ । हकप्रद निष्काशनको अनुमति माग गर्दै कम्पनीले नेपाल धितोपत्र बोर्डमा निवेदन दिएको छ ।
हिमालयनले एक सय रुपैयाँ अंकित मूल्यमा ६४ करोड २० लाख रुपैयाँ बराबरको ६४ लाख २० हजार कित्ता हकप्रद सेयर निष्काशन गर्नेछ । हकप्रद निष्काशनका लागि कम्पनीले एनएमबि क्यापिटल लिमिटेडलाई सेयर निष्काशन तथा विक्री प्रबन्धकमा नियुक्त गरेको छ । कम्पनीले आइतबार अर्थात् चैत्र २० गते नेपाल धितोपत्र बोर्डमा निवेदन दिएको हो ।
हाल हिमालयनको चुक्तापुँजी ३८ करोड ५२ लाख रुपैयाँ रहेको छ । गत आर्थिक वर्षको कमाईबाट कम्पनीले २० प्रतिशत बोनस सेयर जारी गरेको छ । बोनसपछि कायम चुक्तापुँजीको १६६.६७ प्रतिशत हकप्रद सेयर जारी गर्दा हिमालयन जेनेरल इन्स्योरेन्सको चुक्तापुँजी एक अर्ब नाघ्नेछ ।
प्रकाशित मितिः २०७३ चैत २२
वि.सं.२०७३ चैत २२ मंगलवार १३:३२ मा प्रकाशित