काठमाडौं । नेकपा एमालेले आगामी असार १४ गते हुने स्थानीय तहको चुनावका लागि १ नम्बर प्रदेशका एक महानगरपालिका र दुई उपमहानगरपालिकामा उम्मेदवार तय गरेको छ ।
शनिबार पार्टी मुखयालय धुम्बाराहीमा बसेको स्थायी कमिटी बैठकले विराटनगर महानगरपालिकामा एमाले मोरङका अध्यक्ष विनोद ढकाललाई मेयरको उम्मेदवार बनाउने निर्णय गरेको सचिव योगेश भट्टराईद्वारा जारी विज्ञप्तिमा उल्लेख छ । उपमेयरको टुंगो लगाउने जिम्मा प्रदेश संयोजक भीम आचार्यलाई जिम्मा दिइएको छ ।
धरान उपमहानगरपालिकाको मेयरमा तारा सुब्बा र उपमेयरमा मञ्जु भण्डारीलाई उम्मेदवार बनाएको छ । सुब्बा उपमहानगर कमिटी अध्यक्ष हुन् ।
इटहरी उपमहानगरपालिका प्रमुखमा एमाले सुनसरी अध्यक्ष द्वारिकलाल चौधरी र उपप्रमुखमा लक्ष्मी गौतमलाई उम्मेदवार बनाइएको छ ।
२७ जेठ २०७४
वि.सं.२०७४ जेठ २७ शनिवार १९:३१ मा प्रकाशित
