काठमाडौ । सरकारले ब्रोकर कमिसनमा भ्याट लगाउने निर्णय गरेपछि बिहीबार सेयर कारोबार प्रभावित हुने भएको छ । ब्रोकरहरु कारोबार गर्न छाडेर छलफल गर्न भन्दै पुँजी बजार नियामक नेपाल धितोपत्र बोर्डतिर लागेका छन् ।
सरकारले केही ब्रोकरहरुलाई कर निर्धारण गरिसकेको छ । यथाशीघ्र भ्याटमा दर्ता हुनु भनेर ब्रोकरहरुलाई पत्र पनि काटिसकेको अवस्था छ । नीतिगत अस्पष्टता भयो । यस्तो अवस्थामा सेयर कारोबार गर्न सकिंदैन, एक ब्रोकरले नेपाली पैसासँग भने । कमिसनमा १३ प्रतिशत भ्याट लगाउँदा काम गर्न नसकिने ब्रोकरहरुको दाबी छ । सरकारले ब्रोकरले पाउने कमिसनमा १३ प्रतिशतका दरले भ्याट तिर्नुपर्ने व्यवस्था गर्न लागेको हो ।
ब्रोकर्स एसोसिएसनका अध्यक्ष प्रियराज रेग्मीले करका विषयमा छलफल गर्न एसोसिएसनको नेतृत्वमा धितोपत्र बोर्डमा छलफल गर्न लागिएको बताए । भ्याट लगाउन भनेर पत्र काटिसकेको अवस्था छ, यसले गर्दा अन्योल उत्पन्न भएको उनले बताए । आन्तरिक राजस्व कार्यालयले केही ब्रोकरहरुलाई कमिसनमा भ्याट तिर्नू भन्दै पत्र काटेको हो । त्यसो त यसअघि महालेखा परीक्षकको कार्यालयले ब्रोकर कमिसनमा भ्याट नलागएको भन्दै यसलाई बेरुजुमा राखेको थियो । सोही बमोजिम अर्थमन्त्रालयले ब्रोकर कमिसनमा भ्याट लगाउने निधो गरेको हो ।
सेयर दलालहरुलाई भ्याट रकम बुझाउन र भ्याटमा दर्ता हुन २०६९ सालमै पत्राचार गरिएको भएपनि अहिले पनि कयौं सेयर दलालहरु भ्याटमा दर्ता नभई कमिशन असुलेर कारोबार गरिरहेको भन्दै आन्तरिक राजश्व बिभागले कर असुली गर्नबाट पछि नहट्ने बताएको छ ।
प्रकाशित मितिः २०७४ असार १५
वि.सं.२०७४ असार १५ बिहीवार १२:०५ मा प्रकाशित
