काठमाडौ । ओम डेभलपमेन्ट बैंकले सोमबारदेखी हकप्रद सेयरको बिक्री खुला गरेको छ । बैंकले हाल कायम पुँजीको दश बराबर तीन कित्ताका दरले ४९ लाख ३१ हजार ८३५ कित्ता हकप्रद जारी गरेको हो । मनास्लु विकास बैंकलाई गाभेको बैंकले राष्ट्र बैंकले तोकेको पूँजी पूर्याउन हकप्रद सेयर बिक्रीमा ल्याएको हो ।
बैंकले ४९ करोड ३१ लाख ८३ हजार ५ सय रुपैयाँ बराबरको ४९ लाख ३१ हजार ८ सय ३५ कित्ता हकप्रद बिक्रि खुला गरेको हो । बैंकको हकप्रदमा कात्तिक २६ गतेसम्म आवेदन दिन सकिनेछ ।
बैंकको हकप्रद सेयरमा गत भदौ २९ गतेसम्म कायम रहेका सेयरधनीले मात्र आवेदन गर्न पाउनेछन् । हकप्रद प्रयोजनका लागि बैंकले भदौ ३० गते शेयरधनी दर्ता पुस्तिका बन्द गरेको थियो ।
यसको एनआईबिएल क्यापिटल मार्केट्स बिक्रि प्रबन्धक रहेको छ । शेयरधनीले एनआईबिएल क्यापिटल मार्केट्सको कार्यालय लाजिम्पाट, ओम डेभलपमेन्ट बैंकको सम्पूर्ण शाखाहरु र नेपाल इन्भेस्टमेन्ट बैंकको बिराटनगर, बिरगंज, नेपालगंज, इटहरी तथा धनगढी शाखाबाट आवेदन दिन सक्ने छन् ।
गोरखाको मनास्लु र कास्कीको ओम मर्जर भएर बनेको बैंकको चुक्ता पुंँजी १ अर्ब ६४ करोड पुगेको छ। हकप्रद बिक्रिपश्चात ओम विकासको चुक्ता पुंजी २ अर्ब १३ करोड पुग्ने छ।
यस्तै गुहेश्वरी मर्चेन्ट बैंकिङ एन्ड फाइनान्सले कात्तिक १२ गतेदेखि ४० प्रतिशत हकप्रद सेयर बिक्री खुला गर्ने भएको छ । कम्पनीले १०ः४ अनुपातमा (प्रत्येक १० सेयर बराबर थप ४ कित्ता) १०० रुपैयाँ अंकित मूल्यको १९ लाख ७३ हजार ९२८.७७ कित्ता सेयर बिक्री गर्न लागेको हो । मंसिर १८ गतेसम्म यो हकप्रद भर्न पाइनेछ । यसमा असोज २६ गतेसम्म कायम रहेका सेयरधनीले मात्र यसमा आवेदन दिन सक्नेछन् ।
बिक्री प्रबन्धक एनआइबीएल क्यापिटल मार्केट्स लाजिम्पाट काठमाडौ र गुहेश्वरीको हरिहर भवन, पुल्चोक ललितपुर तथा कम्पनीका अधिकांश शाखा कार्यालयबाट यसमा आवेदन दिन सकिनेछ ।
त्यसैगरी, नेपाल इन्भेष्टमेन्ट बैंकको पोखरा, विराटनगर, नारायणगढ, नेपालगञ्ज र धनगढी शाखाबाट पनि आवेदन दिन सकिनेछ । हाल गुहेश्वरीको चुक्ता पुँजी ४९ करोड ३४ लाख ८२ हजार १९२ रुपैयाँ छ । हकप्रद निष्काशनपछि भने कम्पनीको चुक्ता पुँजी ६९ करोड ८ लाख ७५ हजार ६९ रुपैयाँ पुग्नेछ ।
प्रकाशित मितिः २०७४ असो २३
वि.सं.२०७४ असोज २३ सोमवार १०:४४ मा प्रकाशित