काठमाडौं । वोमी माइक्रोफाइनान्स वित्तीय संस्थाले ३० प्रतिशत हकप्रद जारी गर्न जेठ ४ मा बुक क्लोज गर्ने भएको छ । कम्पनीले ३० प्रतिशत हकप्रद निष्कासनका लागि धितोपत्र बोर्डबाट अनुमति पनि पाइसकेको छ । अब कम्पनीले छिट्टै १० बराबर ३ को अनुपातमा २ लाख ३३ हजार २८० कित्ता हकप्रद सेयर निष्कासन गर्नेछ ।
यस आधारमा, जेठ ३ गतेसम्म कायम सेयरधनीले वोमीको हकप्रद सेयरमा आवेदन दिन सक्नेछन् । बुक क्लोज हुनुभन्दा अघिल्लो दिनसम्म कायम सेयरधनीले मात्र हकप्रद भर्न पाउने हुँदा जेठ ३ गतेभित्र नै सेयर किनिसक्नुपर्नेछ । यसमा बिक्री प्रबन्धकको काम सिद्धार्थ क्यापिटलले गर्नेछ । हाल कम्पनीको चुक्ता पुँजी ७ करोड ७७ लाख ६० हजार रुपैयाँ रहेको छ ।
हकप्रद बिक्रीपछि चुक्ता पुँजी १० करोड १० लाख ८८ हजार रुपैयाँ पुग्नेछ । चालु आर्थिक वर्षको तेस्रो त्रैमासमा वोमीले २ करोड ९५ लाख १० हजार रुपैयाँ खुद नाफा कमाएको छ । प्रतिसेयर आम्दानी ५० रुपैयाँ ५० पैसा रहेको यस कम्पनीको प्रतिसेयर नेटवर्थ भने १७० रुपैयाँ ४१ पैसा छ ।
२०७५ बैशाख २७ गते प्रकाशित
वि.सं.२०७५ वैशाख २७ बिहीवार १४:०१ मा प्रकाशित
