काठमाडौं । नेपाल क्रेडिट एण्ड कर्मस बैंकले हालसम्म कै ठूलो कित्ता शेयर लिलामीमा ल्याउने भएको छ । बैंकले यसअघि बिक्री गरेको चुक्ता पूँजीको ५० प्रतिशतमा अवितरित भएको सो परिमाणको शेयर पुस ११ गतेदेखि लिलामीमा ल्याउने भएको हो । बैंकले पुस ११ गतेदेखि ७९ लाख १० हजार ९९३ कित्ता सेयर लिलामी प्रक्रियाबाट बेच्ने भएको छ । जसमध्ये, संस्थापक समूहको ६५ लाख १६ हजार ७९५ कित्ता र सर्वसाधारण समूहको १३ लाख ९४ हजार १९८ कित्ता सेयर रहेको छ । लगानीकर्ताले न्यूनतम १०० रुपैयाँलाई आधार मानेर प्रतिस्पर्धात्मक बोलकबोलमा सहभागी हुनुपर्नेछ ।
बैंकले यसअघि भदौ ४ देखि असोज २२ गतेसम्म २ बराबर १को अनुपातमा २ करोड ३३ लाख ९५ हजार २९१ कित्ता हकप्रद सेयर बिक्रीमा ल्याएको थियो । त्यसबेला १ करोड ५४ लाख ८४ हजार २९० कित्ताका लागि मात्र आवेदन परेको थियो । नबिकेको ७९ लाख १० हजार ९९३ कित्ता सेयर लिलामीमा ल्याउन लागिएको हो । यसमा इच्छुक लगानीकर्ताले पुस २० गते शुक्रबारसम्म आवेदन दिन सक्नेछन् ।
बैंकको हकप्रद शेयर बिक्री प्रबन्धक सनराइज क्यापिटल रहेको छ । लिलामी गर्न इच्छुकले बिक्री प्रबन्धकको कार्यालय कमलपोखरी, र एनसीसी बैंकका विराटनगर, विरगञ्ज, बुटवल, पोखरा, नेपालगञ्ज, सुर्खेत, धनगढी, नारायणगढ, बनेपा, र मुख्य शाखा कार्यालय बागबजारबाट शिलबन्दी बोलपत्र पेश गर्न सक्नेछन् ।
हाल एनसीसीको चुक्ता पुँजी ४ अर्ब ६८ करोड ५९ लाख २ हजार रुपैयाँ छ । बाँकी रहेको सेयर लिलामीमा बिक्री भएपछि पुँजी ७ अर्ब २ करोड रुपैयाँ पुग्नेछ । एनसीसी बैंकले चालु आर्थिक वर्षको पहिलो त्रैमासमा ४६ करोड ९१ लाख ३७ हजार रुपैयाँ खुद नाफा कमाएको छ । यसको प्रतिसेयर आम्दानी ४० रुपैयाँ ५ पैसा र प्रतिसेयर नेटवर्थ २०५ रुपैयाँ ४ पैसा छ ।
२०७५ पौष ३ गते प्रकाशित
वि.सं.२०७५ पुस ३ मंगलवार ११:४३ मा प्रकाशित
