काठमाडौं । उर्जा,जलस्रोत तथा सिंचाईमन्त्री वर्षमान पुनले बाग्मती जलाधार नदी संरक्षण परियोजनाको स्थलगत अनुगमन गर्नुभएको छ ।
मन्त्री पुन सिंचाई मन्त्रालयका सचिव डा.संजय शर्मासहित शनिवार परियोजनास्थल पुग्नुभएको हो । मन्त्री पुनले मन्त्रालयअन्र्तगतका जलविद्युत परियोजना र सिंचाईका आयोजनाको निरिक्षणका लागी विदाको दिन समेत अनुगमनमा निस्कदै आउनु भएको छ ।
उहाँले आयोजनाको अवस्था र मन्त्रालयको तर्फबाट गर्नुपर्ने सहयोगको वारेमा आयोजनाका अधिकारीसँग छलफल गर्नुभएको हो । मन्त्री पुनले आयोजनास्थलमा आयोजित छलफलमा भन्नुभयो ‘वाग्मती सम्पदासगँ जोडिएकोले यो आयोजना समयमा बनाउनुपर्ने हुन्छ, यो नयाँ आयोजना पनि हो, हामीले राष्ट्रिय गौरव र विशेष महत्वको आयोजनालाई प्राथमिकतामा राखेका छौं ।’
मन्त्री पुनले जिम्मेवारीपूर्ण तरिकाले काम गर्न निर्देशन दिनुभएको छ । वाग्मती सभ्यतासँग जोडिएको आयोजना भएकाले पनि यसमा सवैको चाँसो रहेको भन्दै मन्त्री पुनले छिटोभन्दा छिटो काम सम्पन्न गर्न निर्देशन दिनु भयो ।
‘यो परियोजनामा सवैको चाँसो छ, काठमाडौंमा धेरै मानिसहरुलाई यसले प्रत्यक्ष प्रभाव पनि पार्छ । त्यसैले यसमा जिम्मेवारीका साथ काम गर्नुहुन्छ भन्ने मेरो विश्वास छ’, मन्त्री पुनले भन्नुभयो ।
उहांले मन्त्रालयको तर्फबाट गर्नुपर्ने सहजीकरणमा कुनै कमी नहुने भन्दै समयमै पुरा गर्ने तर्फ ध्यान दिन निर्देशन दिनुभयो ।
मन्त्री पुनले निर्माणको जिम्मा पाएको कम्पनीलाई समयमा काम सम्पन्न गर्न आग्रह गर्नुभयो । उहाँले निर्माण व्यवसायीहरुले काम समय नगर्दा राज्य र सरकारमाथी प्रश्न उठ्को भन्दै जिम्मेवार वन्न चेतावनी दिनुभएको छ । वाग्मती मानव सभ्यतासँग जोडिएकाले पनि यसको संरक्षणका लागि लागि लाग्नुपर्ने उहाँको भनाइ थियो ।
काठमाडौंको गोकर्णेश्वर नगरपालिकामा रहेको उक्त परियोजना सम्पन्न भइसकेपछि वाग्मती सफाईमा सहयोग पुग्ने विश्वास लिइएको छ । आयोजना प्रमुख नवराज सुवेदीकाअनुसार उक्त ड्याम निर्माण भईसकेपछि पानी जम्मा गरेर हिउँदमा बाग्मतीमा पठाउने तयारी छ ।
२०७५ चैत २४ गते प्रकाशित
वि.सं.२०७५ चैत २४ आइतवार १०:३३ मा प्रकाशित
