काठमाडौं । गुराँस लाइफ इन्सुरेन्सको असार ५ गतेदेखि ३ लाख २२ हजार ५७६ कित्ता सेयर लिलामी खुला भएको छ । कम्पनीले संस्थापक समूहको २ लाख ४० हजार ५७१ कित्ता र सर्वसाधारण समूहको ८२ हजार ५ कित्ता सेयर लिलामीमा ल्याएको हो । यसमा असार १२ गतेसम्म बोलपत्र पेश गर्ने पाइनेछ ।
संस्थापक समूहमा न्यूनतम १ हजार कित्ता र सर्वसाधारण समूहमा न्यूनतम १०० कित्ताका लागि आवेदन दिन सकिनेछ । अधिकतम १० अंकले भाग जाने सम्पूर्ण कित्ताका लागि आवेदन दिन सकिनेछ । संस्थापक सेयरको हकमा भने लिलामी खुला रहेको मितिसम्म कायम संस्थापक सेयरधनी मात्र आवेदन दिन योग्य रहनेछन् ।
यसमा बिक्री प्रबन्धकको काम लक्ष्मी क्यापिटल मार्केट लिमिटेडले गरेको छ । लक्ष्मी बैंकको बिर्तामोड, जनकपुर, विराटनगर, हेटौंडा, नारायणगढ, पोखरा, बुटवल, वीरगञ्ज, बाग्लुङ, दाङ, सुर्खेत, नेपालगञ्ज, धनगढी र महेन्द्रनगरबाट आवेदन दिन सकिनेछ । यसैगरी, लक्ष्मी क्यापिटल मार्केट, नयाँ बनेश्वर, काठमाडौंबाट पनि बोलपत्र बुझाउन सकिनेछ ।
गुराँस लाइफको बुधबार नेप्सेमा प्रतिकित्ता ५ सय ६ रुपैयाँमा अन्तिम कारोबार भएको छ । यही बजार भाउलाई ख्याल गरेर लिलामीमा आवेदन दिनुपर्ने हुन्छ । कम्पनीले गत चैत २८ गतेदेखि जेठ १ गतेसम्म २ बराबर १को अनुपातमा हकप्रद निष्कासन गर्दा बिक्री नभएको सेयर अहिले लिलामी गर्न लागेको हो । त्यसबेला कुल २९ लाख ७० हजार कित्ता हकप्रद सेयर बिक्री खुला गरेकोमा २६ लाख ४७ हजार ४२४ कित्ताका लागि मात्र आवेदन परेको थियो ।
२०७६ असार ५ गते प्रकाशित
वि.सं.२०७६ असार ५ बिहीवार १३:०१ मा प्रकाशित