काठमाडौं । आज बिहान सिंहदरबारमा जारी आर्थिक वर्ष २०७६/७७ को वार्षिक कार्ययोजना प्रस्तुति तथा कार्यसम्पादन सम्झौता हस्ताक्षर कार्यक्रम आयोजना गरिएको छ। प्रधानमन्त्री केपी शर्मा ओलीले आर्थिक वर्ष २०७६/७७ का लागि मन्त्रालयका सचिवहरुसँग कार्यसम्पादन सम्झौतामा हस्ताक्षर गर्ने भएपछि त्यसकै लागि आज बिहान उक्त कार्यक्रममा विभागी मन्त्रीहरु तथा सबै मन्त्रालयका सचिवहरु उपस्थित भएका थिए।
आर्थिक वर्ष २०७६/७७ का लागि सबै मन्त्रालयबाट मन्त्रालयगत योजना मागेपछि प्रधानमन्त्री ओलीले कार्यसम्पादन सम्झौता गर्न लागेका हुन् । प्रधानमन्त्रीले सबै मन्त्रालयबाट यो आर्थिक वर्षमा कार्यान्वयन गरिने योजना माग्नु भएको छ। तिनको अध्ययनपछि कार्यान्वयनका लागि मन्त्री र सचिवहरुसँग करार सम्झौता गर्ने योजना छु, प्रधानमन्त्रीका प्रेस संयोजक चेतन अधिकारीले भने, पहिले मन्त्री र सचिव बसेर यो प्रक्रिया पुरा गर्ने चलन थियो। तर यो पटक सचिव र मन्त्री दुवैलाई सँगै राखेर प्रधानमन्त्री कार्यसम्पादन सम्झौतामा हस्ताक्षर गराउन लाग्नुभएको हो।
आजको छलफलमा मन्त्रालयगत छलफल गरेपछि प्रधानन्त्रीले मन्त्री र सचिवहरुबाट योजना कार्यान्वयनको प्रतिवद्धता माग्ने छन्। साथै त्यो प्रतिवद्धता पत्रमा हस्ताक्षर गराइने भएको छ। प्रधानमन्त्री ओलीले गत वर्ष पनि मन्त्री र सचिवहरूसँग प्रतिबद्धता लिएका थिए।
प्रधानमन्त्री ओलीले यो पटक जनताले महसुस गर्ने गरी विकासको काम अघि बढाउने बताउँदै आएका छन्। त्यही कारण प्रमले सचिव र मन्त्रीहरुलाई एकै ठाउँ राखेर प्रतिवद्धता पत्रमा हस्ताक्षर गराउन लागेका हुन्। प्रधानमन्त्रीले हरेक मन्त्रालयबाट सचिव र मन्त्रीलाई अलग अलग प्रतिवद्धता पत्रमा हस्ताक्षर गराउने कार्यक्रम छ। सचिवलाई मात्रै नभएर मन्त्रीलाई यो सम्झौता पत्रमा हस्ताक्षर गरेर त्यही अनुसार परिणाम निकाल्ने गरी काम गराउने योजना प्रधानमन्त्रीले बनाएका छन्।
२०७६ साउन १५ गते प्रकाशित
वि.सं.२०७६ साउन १५ बुधवार १४:४९ मा प्रकाशित
