म्याग्दी। जिल्ला समन्वय म्याग्दीले जिल्लाका ६ स्थानीय तहलाई करीब ४ करोड रुपैयाँ बजेट वितरण गरेको छ । जिल्ला समन्वय म्याग्दीको कोषबाट बेनी नगरपालिकालाई ८० लाख र पाँचओटा गाउँपालिकालाई ६० लाख रुपैयाँका दरले ३ लाख ८० हजार रुपैयाँ बजेट बाँडफाँट गर्ने निर्णय गरेको हो ।
तत्कालीन जिल्ला विकास समितिको १५ ओटा खाताबाट जिसस कोषमा जम्मा भएको रकममध्ये कर्मचारीहरूको कल्याणकारी कोषमा छुट्याएर बाँकी रहेको बजेटलाई स्थानीय तहमा पूर्वाधार निर्माणमा विनियोजन गर्न थालेको हो ।
जिससको कोषमा सात करोड ५५ लाख ८३ हजार ५९३ रुपैयाँ थियो । सो कोषको रकममा कर्मचारीहरूको कल्याणकारी कोषमा ४४ लाख ५५ हजार २४ रुपैयाँ छुट्याइएको छ ।
चौथो जिल्ला सभाबाट स्थानीय तहहरूको भवन निर्माण प्रयोजनको लागि बजेट विनियोजन गरिएको जिससका प्रमुख देवेन्द्रबहादुर केसीले जानकारी दिए । कोषमा बाँकी रहेको ३ करोड ३१ लाख बजेट पनि आवश्यकताको आधारमा स्थानीय तहहरूलाई नै उपलब्ध गराइने केसीले बताए ।
२०७६ साउन २४ गते प्रकाशित
वि.सं.२०७६ साउन २४ शुक्रवार १२:१५ मा प्रकाशित