काठमाडौं । प्राइम लाइफ इन्सुरेन्सले १२.५ प्रतिशत बोनस सेयर दिने निर्णय गरेको छ । कम्पनीको बिहीबार बसेको सञ्चालक समिति बैठकले आर्थिक वर्ष २०७४/७५ को नाफाबाट १२.५ प्रतिशत बोनस सेयर दिने निर्णय गरेको हो ।
कर तिर्न नगद लाभांश पनि दिनेछ । लाभांश अनुमोदन गर्न कम्पनीले असोज ७ गते विशेष साधारण सभा समेत बोलाएको छ । प्राइमले पनि आर्थिक वर्ष २०७५/७६ को लाभांश घोषणा गर्न बाँकी छ ।
सामान्यतयः लाभांश प्रस्ताव वार्षिक साधारण सभाबाट अनुमोदन गरिने भए पनि प्राइमले भने विशेष साधारण सभामार्फत अनुमोदन गर्ने भनेको छ । नियामकीय प्रावधान अनुसार चुक्ता पुँजी पुर्याउन कम्पनीले हतारमा विशेष सभामार्फत लाभांश अनुमोदन गर्न खोजेको देखिन्छ ।
यस इन्सुरेन्सले २२ करोड ३१ लख ४ हजार ३७५ रुपैयाँ बरारबरको बोनस वितरण गर्नेछ । बोनसमा लाग्ने कर प्रयोजनका लागि १ करोड १७ लाख ४२ हजार ३३६ रुपैयाँ नगद लाभांश पनि बाँड्नेछ ।
यो लाभांश नियामक बिमा समिति र आगामी साधारण सभाले अनुमोदन गरेपछि वितरण हुनेछ । हाल प्राइमको चुक्ता पुँजी १ अर्ब ७८ करोड ४८ लाख ३५ हजार रुपैयाँ रहेको छ । बोनसपछि पुँजी २ अर्ब ७९ लाख ३९ हजार ३७५ रुपैयाँ पुग्नेछ ।
सभा प्रयोजनका लागि प्राइमले भदौ ३१ गते बुक क्लोज गर्ने भएको छ । भदौ ३० गते कायम सेयरधनीले मात्र लाभांश पाउनेछन् । प्राइमले गत आर्थिक वर्षको अन्त्यसम्ममा ३१ करोड ३० लाख ९७ हजार रुपैयाँ खुद नाफा कमाएको छ ।
प्रतिसेयर आम्दानी १० रुपैयाँ ५४ पैसा रहेको प्राइमको प्रतिसेयर नेटवर्थ १७६ रुपैयाँ ७० पैसा छ ।
२०७६ भदौ २० गते प्रकाशित
वि.सं.२०७६ भदौ २० शुक्रवार ०९:२५ मा प्रकाशित
