काठमाडौं । बैंकिंङ कसुर अपराधमा बैंक अफ काठमान्डूका पुर्व सीईओ तथा बहालवाला कर्मचारी पक्राउ परेका छन ।
पुर्व सीईओ अजय श्रेष्ठ सहित बहालवाला पाँच कर्मचारीलाई केन्द्रीय अनुसन्धान ब्युरोको टोलीले गत शुक्रबार नै पक्राउ गरेको जनाएको छ ।
प्रहरीले पूर्वसीइओ श्रेष्ठलाई गत शुक्रबार नियन्त्रणमा लिएको ब्युरोका एसपी दिपक रेग्मीले बिजपाटीलाई बताउनुभयो । उहाँका अनुसार खोलाको जग्गा धितोमा राखेर ऋण प्रवाह गरेको अभियोगमा अनुसन्धान गर्ने क्रममा उनीहरुलाई पक्राउ गरिएको रेग्मीले जानकारी दिनुभयो।
पक्राउ पर्नेमा अजय श्रेष्ठ सहित बिक्रम पन्त, किरण बोहोरा, ऋचा श्रेष्ठ, पुष्पराज भण्डारी, शुष्मा शाह छन । सन् २०१५ मा बैंक अफ काठमाण्डूबाट जग्गाको नक्कली धनीपूर्जा राखेर ऋणीले ५ करोड रुपैयाँ ऋण लिएका थिए ।
पछि ऋणको सावाँ र ब्याज नतिरेपछि अनुसन्धानको क्रममा मिलोमतोको तथ्य खुलेको हो । तथ्य फेला परेपछि बैंकले ऋणी सुरेन्द्र श्रेष्ठलाई बैंकिङ कसूर गरेको अभियोगमा प्रहरीमा किटानी जाहेरी दिएको थियो । तर अनुसन्धान गर्दै जाँदा यो प्रकरण पुर्व सीईओ श्रेष्ठसम्म पुगेको हो ।
सीइओ अजय श्रेष्ठ बैंक अफ काठमाण्डूबाट ०७४ असार मसान्तदेखी बाहिरिएका हुन । उक्तबैंकमा करिब दुई कार्यकाल काम गरेका श्रेष्ठले त्यसअघि २ बर्ष एनएमबि बैंकमा काम गरेका थिए।
करिब ३२ बर्ष बैंकिंङ अनुभव भएका श्रेष्ठले १५ बर्ष स्ट्यान्डर्ड चार्टर्ड बैंकमा काम गरेका थिए । उनलाई बैंकिंङ क्षेत्रमा इमान्दार बैंकरको रुपमा चिनिन्छ ।
२०७६असोज ०५ गते प्रकाशित
वि.सं.२०७६ असोज ५ आइतवार १२:०४ मा प्रकाशित