काठमाडौं । मेगा बैंक नेपाल लिमिटेडले यस वर्ष शेयरधनीहरुलाई ११ दशमलव ७५ प्रतिशत नगद लाभांश मात्र दिने भएको छ ।
बैंकको असोज ८ गते बसेको सञ्चालक समितिको बैठकले गत आव २०७५र७६ को मुनाफाबाट हाल कायम चुक्तापूँजीको आधारमा सो नगद लाभांश दिने निर्णय गरेको हो ।
प्रस्तावित लाभांश नेपाल राष्ट्र बैंकको स्वीकृति र आगामी वार्षिक साधारण सभाले पारित गरेपश्चात मात्र लगानीकर्ताहरुले प्राप्त गर्न सक्नेछन ।
अघिल्लो आवको नाफाबाट बैंकले गत वर्ष १ प्रतिशत बोनस शेयर र ६ दशमलव ८५ प्रतिशत नगद लाभांश दिएको थियो । लाभांशको निर्णय गरेकै दिन बैंकले गण्डकी विकास बैंकलाई प्राप्ती गर्ने सैद्धान्तिक सहमति समेत गरेको छ ।
हाल बैंकको चुक्तापूँजी रू. १० अर्ब ३८ करोड ८६ लाख २१ हजार छ । गत आवमा यस बैंकले रू. १ अर्ब ७१ करोड ९२ लाख ६९ हजार खुद नाफा गरेको थियो ।
वितरण योग्य नाफा रू. १ अर्ब ३५ करोड ८० लाख ७६ हजार थियो । सोही नाफाबाट बैंकले लगानीकर्ताहरुलाई लाभांश दिन लागेको हो ।
२०७६ असोज ०९ गते प्रकाशित
वि.सं.२०७६ असोज ९ बिहीवार १३:२७ मा प्रकाशित
