काठमाडौं । गैरआवासीय नेपाली संघको (एनआरएनए) को नवौं अन्तराष्ट्रिय महाधिवेशन मंगलवारदेखि शुरु हुँदै छ ।काठमाडौंको होटल हायातमा हुने महाधिवेशनले नयाँ नेतृत्वको निर्वाचन गर्ने भएको छ ।
नेतृत्वका लागि वर्तमान उपाध्यक्षद्वय कुमार पन्त र कुल आचार्यले प्रतिष्पर्धा गर्ने भएका छन । मंगलवार उदघाटन सत्र सम्पन्न भएपछि नयाँ नेतृत्वका लागि निर्वाचन हुनेछ ।
नयाँ नेतृत्व छान्न संघले गठन गरेको निर्वाचन समितिले निर्वाचन कार्यतालिका समेत सार्वजनिक गरेको छ । जसअनुसार सोमवारदेखि नै नामदर्ता, मतदाता नामावली प्रकाशन, उम्मेदवारी दर्ता लगायत निर्वाचन कार्यतालिका प्रकाशित गरिसकेको छ ।
यस्तो छ निर्वाचन कार्यतालिका
निर्वाचनमा कुल १२ पदमा ४२ जना उम्मेदवारहरु निर्वाचित हुनेछन । संघको अध्यक्षमा एकजना, उपाध्यक्षमा ५ जना (एक महिलासहित), महासचिवमा १ जना, सचिवमा २ जना, कोषाध्यक्ष, सहकोषाध्यक्ष, महिला संयोजक र युवा संयोजकमा १/१ जना निर्वाचित हुनेछन ।
प्रत्येक क्षेत्रीय समितिबाट एक/एकजना गरी ६ जना क्षेत्रीय संयोजकहरु विश्व सम्मेलनबाट निर्वाचित हुनेछन । त्यसैगरी क्षेत्रीय उपसंयोजक अन्तर्गत यसपटक युरोप क्षेत्रबाट ३ जना निर्वाचित हुने निर्वाचन समितिले जनाएको छ ।
विधानबमोजिम युरोपमा ३ जना क्षेत्रीय उपसंयोजक, एसिया प्रशान्त, अफ्रिका र मध्यपूर्वबाट २/२ जना क्षेत्रीय उपसंयोजक छानिने छन भने उत्तर– दक्षिण अमेरिका र ओसेनियाबाट १/१ जना क्षेत्रीय उपसंयोजकमा निर्वाचित हुन पाउने छन ।
प्रत्येक क्षेत्रबाट १/१ जनाका दरले ६/६ जना क्षेत्रीय महिला संयोजक र क्षेत्रीय युवा संयोजक चुनिने समितिले जनाएको छ ।
२०७६ असोज २७ गते प्रकाशित
वि.सं.२०७६ असोज २७ सोमवार १८:५१ मा प्रकाशित