काठमाडौं । संघीय मामिला तथा सामान्य प्रशासन मन्त्रालयले स्थानीय सरकारलाई सामुदायिक विद्यालयमा शिक्षक नियुक्त गर्न रोक लगाएको एक साता पनि नबित्दै मध्यनेपाल नगरपालिका लमजु्ङ भोर्लेटारले शिक्षकको विज्ञापन खोलेको छ ।
प्रस्तावित माध्यमिक विद्यालयमा करारमा शिक्षक नियुक्ति गर्नु पर्ने भएकोले विज्ञापन खोलेको नगरपालिकाले जनाएको छ ।
मावि तहको गणित विषयका लागि ३, विज्ञान विषयका लागि २, नेपाली विषयका लागि १ र नेपाली विषयकै निमावि तहका लागि १ जना गरी ७ पदमा विज्ञापन गरिएको हो ।
माविका लागि सम्बन्धित विषयमा स्नातक र निमाविका लागि कक्षा १२ वा सो सरहको शैक्षिक योग्यता हुनु पर्ने भन्दै गरिएको उक्त विज्ञापनमा अध्यापन अनुमति पत्र अनिवार्य योग्यता उल्लेख गरिएको छ ।
माविका लागि ३५ हजार ९ सय ९० र निवाविका लागि २८ हजार २ सय तलब स्केल सहित गरिएको सो विज्ञापनमा उक्त श्रोत यस बर्षको लागि विनियोजित रकमबाट व्यवस्थापन गर्ने उल्लेख छ ।
आगामी आर्थिक बर्षको असार सम्मका लागि एक बर्षे करारमा नियुक्त गरिने उक्त पदमा कात्तिक १८ गते भित्र आवेदन दिन भनिएको छ ।
२०७६ कात्तिक ०५ गते प्रकाशित
वि.सं.२०७६ कात्तिक ५ मंगलवार १४:४१ मा प्रकाशित
