काठमाडौं । नागढुङगा–नौविसे सुरुङमार्ग आयोजनाका लागि धादिङतर्फ परेका जग्गाहरुको मुआब्जा वितरण प्रक्रिया अघि बढेको छ ।
जिल्लाको धुनिवेशी नगरपालिका वडा न ९–साविकको नौविसे गाविस वडान ४ (क) र ४ (ङ) अन्तर्गतका अधिग्रहणमा पर्ने जग्गाहरुको मुआब्जा निर्धारण भए अनुसार सम्वन्धति जग्गा धनीहरुबाट निवेदन पेश गर्न आयोजनाले सार्वजनिक सुचना निकालेको छ ।
यसअघि नै आयोजना अधिकारी, जग्गाधनि, प्रमुख जिल्ला अधिकारीलगायत बसेर मुआब्जा टुङग्याएका थिए । सुचनामा जग्गाधनी प्रमाण पुर्जा, तिरो तिरेको रसिद, सम्वन्धित नगरपालिका वा वडाको सिफारिस, नागरिकताको प्रमाणपत्रको फोटोकपी तथा अन्य प्रमाणहरु सक्कलै संलग्न गरी पेश गर्न भनिएको छ ।
यसअघि साउनमा नै सुचना निकाल्दै मुआब्जाका लागि निवेदन दिन भनिएको भएपनि अहिलेसम्म कसैले निवेदन नदिएको आयोजनाले जनाएको छ ।
आयोजना प्रमुख श्यामप्रसाद खरेलका अनुसार काठमाडौंतर्फ मुआब्जाको खासै समस्या नरहेपनि धादिङतर्फ समस्या छ । उहाँका अनुसार काठमाडौंतर्फ कुल २२३ रोपनी जग्गा परेको छ । जसमा करिव ३२ रोपनी जग्गा सरकरी छ ।
२ सय ९१ रोपनी जग्गा अधिग्रहण गर्नुपर्नेमध्ये ९० प्रतिशत भैसकेको छ । विवादित, लाल पुर्जा नभएका, जग्गाधनी सम्पर्क विहिन भएका जग्गाहरु मात्रै अधिग्रहण गर्न बाँकी छ ।
आयोजनाका अनुसार धादिङतर्फ कुल १०९ रोपनी अधिग्रहण गर्नुपर्नेछ । करिव ५० प्रतिशत गुठीका नाममा रहेका कारण समस्या आएको हो ।
गुठीको नियम अनुसार जग्गा कमाउनेलाई ३३ र गुठीलाई बाँकी ६७ प्रतिशत दिनुपर्छ । तर त्यहाँका स्थानीयले ३३ प्रतिशत मात्रै मुआब्जा पाउँदा विस्थापित नै हुनुपर्ने भन्दै विवाद निकालेका थिए । गुठीको जग्गाको विवाद मन्त्रीपरिषदमा लगेर टुङग्याउने तयारी छ ।
तिहारपछि काम सुरु गरेर आगामी ४२ महिनामा सुरुङमार्ग तयार हुनेछ । निर्माणको जिम्मा जापानी कम्पनी हाज्मा आन्दो कर्पोरेशनले पाएको छ । निर्माण कम्पनी साईटमा क्याम्प बनाएर काम गर्न तयारी अवस्थामा छ ।
२०७६ कात्तिक ०७ गते प्रकाशित
वि.सं.२०७६ कात्तिक ७ बिहीवार १२:२६ मा प्रकाशित