काठमाडौं । केन्द्रीय बैंकले बैंक तथा वित्तीय संस्थाको मुद्दति निक्षेपमा १ अर्ब ६३ करोड ९४ लाख रुपैयाँ लगानी गर्ने भएको छ । नेपाल राष्ट्र बैंकले १ वर्षे मुद्दति निक्षेपमा उक्त रकम लगानी गर्न लागेको हो ।
बैंकले आफ्नो विभिन्न कोषमा रहेको रकम आगामी मंसिर १ देखि २०७७ कात्तिक ३० गतेसम्म त्रैमासिकरुपमा ब्याज भुक्तान हुने गरी लगानी गर्न लागेको हो ।
राष्ट्र बैंकबाट इजाजतपत्र प्रप्त ‘क’, ‘ख’ र ‘ग’ वर्गका बैंक तथा वित्तीय संस्थाको मुद्दति निक्षेपमा लागानी गरिने उल्लेख छ । बैंकले ‘क’ वर्गका वाणिज्य बैंकमा १ अर्ब ३१ करोड १६ लाख, ‘ख’ वर्गका राष्ट्रियस्तरका विकास बैंकमा २४ करोड ५९ लाख र ‘ग’ वर्गका राष्ट्रियस्तरका वित्त कम्पनीहरुमा ८ करोड १९ लगानी गर्नेछ ।
बैंक तथा वित्तीय संस्थाले आफूले लिन चाहेको रकम तथा उक्त रकमका लागि प्रस्ताव गरिएको ब्याजदर समेत खुलाइ आवेदन दिनुपर्ने केन्द्रीय बैंकले जनाएको छ ।
बैंकले यही कात्तिक २२ गते अपराह्न १ बजेसम्म वित्त व्यवस्थापन विभागमा आवेदन दिन बुधबार एक सूचनामार्फत आग्रह गरेको छ ।
बैंकले त्यसका लागि बैंक तथा वित्तीय संस्था सञ्चालनमा आएको कम्तीमा पनि दुई वर्ष पूरा भएको, बैंकले तोकेको न्यूनतम पूँजी कोष कायम भएको, खराब कर्जा कूल कर्जा सापटको पाँच प्रतिशत वा सोभन्दा बढी नरहेको, कर्जा स्वदेशी निक्षेप र प्राथमिक पूँजी अनुपात बैंकले समय समयमा निर्धारण गरेको सीमा क्षेत्रभित्र रहेको र अघिल्लो आर्थिक वर्षमा बैंक मुनाफामा रहेको हुनुपर्नेछ ।
साथै, घर जग्गा कर्जा बैंकबाट तोकिएको सीमाभन्दा बढी नभएको, लगानी गर्ने संस्थाको सञ्चालक, प्रमुख कार्यकारी अधिकृत वा कार्यकारी सञ्चालकलाई कुनै पनि कारवाही नगरेको तथा कारवाहीमा परेको भए फुकुवा भएको कम्तीमा ६ महिना पूरा भएको हुनुपर्नेछ ।
बैंक तथा वित्तीय संस्था समस्याग्रस्त भएको भए कारवाही फुकुवा भएको ६ महीना पूरा भएको र सर्वसाधारणका लागि छुट्याइएको सेयर बिक्री गरेको हुनुपर्ने सर्त बैंकले राखेको छ ।
२०७६ कात्तिक २० गते प्रकाशित
वि.सं.२०७६ कात्तिक २० बुधवार १६:०० मा प्रकाशित