काठमाडौं । आधा दर्जन वाणिज्य बैंकले नियामक नेपाल राष्ट्र बैंकलाई मर्जरका लागि पार्टनर खोजिदिन आग्रह गरेका छन । राष्ट्र बैंकले मर्जर जान दबाब बढाएपछि बैंकहरुले उपयुक्त संस्था खोज्ने जिम्मा राष्ट्र बैंकलाई नै लगाएका हुन् ।
सिटिजन्स, सिभिल, सेञ्चुरी, कुमारी, एनसीसी लगायतका बैंकले मर्जरका लागि जोडी खोजिदिन आग्रह गरेको स्रोतको भनाई छ । बैंकहरुले नै पार्टनर खोजिदिन आग्रह गरेपछि राष्ट्र बैंकका उच्च अधिकारीहरु जोडी खोजिदिने काममा सक्रिय हुन थालेका छन् ।
स्रोतका अनुसार पार्टनर खोजिदिन आग्रह गर्ने बैंकले आफ्नो नाम गुमाउन चाहेका छैनन् । उनीहरुले पनि राम्रा विकास बैंक र फाइनान्स कम्पनी पाए मर्ज गरेर आफ्नो अस्तित्व जोगाउने रणनीति बनाएका छन् ।
‘आगामी २ महिनाभित्र ३ देखि ४ वटा बैंकबीच मर्जर सम्बन्धी सम्झौता हुनेगरी हामीले काम गरिरहेका छौं,’ राष्ट्र बैंक स्रोतले भन्यो, ‘विकास बैंक र फाइनान्स कम्पनी गाभेर अघि बढ्न उहाँहरुको रणनीति त ठीकै हो । तर, उहाँहरु पनि रहनसक्ने अवस्था कम नै देखिन्छ ।’
ग्लोबल र जनता बैंक मर्ज भएर देशकै ठूलो बैंक बनेपछि अन्य संस्थाहरुलाई मर्जरमा जान थप दबाब परेको छ । राष्ट्र बैंकले संख्या घटाउने उदेश्यले बैंकहरुलाई मर्जरमा जान नीतिगतरुपमा प्रोत्साहन र व्यवहारिकरुपमा दबाब दिइरहेको छ ।
२०७६ पुस ०२ गते प्रकाशित
वि.सं.२०७६ पुस २ बुधवार ०८:४१ मा प्रकाशित
