काठमाडौं । नेपाल टेलिकमले आफुसंग भएको पुँजी जलविद्युत र सेयर बजारमा लगानी गर्ने भएको छ ।
टेलिकमको हालै सम्पन्न वार्षिक साधारणसभाले मौज्दात रहेको रकम बैंक तथा वित्तीय कम्पनी, धितोपत्र वा अन्य कम्पनीको सेयर तथा ऋण पुँजी, विद्युत, ऊर्जा तथा प्रसारणलाइन निर्माण र पुर्वाधार साझेदारीका लागि सेवामुलक कम्पनीमा लगानी गर्ने विशेष प्रस्तावलाई पारित गरेको छ ।
सभाले प्रस्ताव पारित गरेपछि टेलिकमले नागरिक स्टक डिलर कम्पनी लिमिटेडमा ४५ करोड रुपैयाँ लगानीको निर्णय समेत गरेको छ । नेपाल टेलिकमसंग चुक्तापुँजी र सञ्चित कोषमा गरी ९१ अर्ब ९१ करोड रुपैयाँ लगानीयोग्य पुँजी छ । चुक्तापुँजी १५ अर्ब र सञ्चित कोषमा ७६ अर्ब ९१ करोड रुपैयाँ छ ।
टेलिकमले ४५६ मेगावाटको माथिल्लो तामाकोसी जलविद्युत आयोजनामा सेयर लगानी गरेको छ । तामाकोसीमा टेलिकमले ६ प्रतिशत सेयर लगानी गरेको छ ।
लगानीको दायरा बढाउन कम्पनीको प्रवन्धपत्रको दफा ४ को बुँदा नम्बर ५ को २१ लाई परिवर्तन गरेको टेलिकमले जनाएको छ र लागि विशेष प्रस्ताव लैजान लागेको हो । टेलिकमले विटिएस टावरलगायत अन्य टेलिकम पूर्वाधार साझेदारी गर्नका लागि स्थापना हुने कम्पनीमा सेयर लगानी गर्ने छ ।
वि.सं.२०७६ फागुन १ बिहीवार ०९:३२ मा प्रकाशित