काठमाडौं । राष्ट्रिय योजना आयोगको पूर्ण बैठकले १५ औं योजना पारित गरेको छ । सोमबार प्रधानमन्त्री निवास बालुवाटारमा बसेको राष्ट्रिय योजना आयोगको पूर्ण बैठकले १५ औं योजनाको विस्तृत दस्तावेज पारित गरेको प्रधानमन्त्रीका प्रेस सल्लाहकार सूर्य थापाले जानकारी दिनुभयो ।
बैठकमा योजना आयोगले तयार पारेको १ सय १७ वटा प्रमुख कार्यक्रमका विषयमा समेत छलफल भएको थियो । प्रधानमन्त्रीले राष्ट्रिय योजना आयोगको पूर्ण बैठकको अध्यक्षता गर्दै गरिबीको रेखामुनी रहेकालाई शून्यमा झार्ने गरी योजना बनाएर काम गर्न निर्देशन दिनुभएको छ ।
योजना आयोगका उपाध्यक्ष डा. पुष्पराज कँडेल १५औं योजनाका आधारपत्रमा थपिएका विषयका बारेमा कार्यपत्र प्रस्तुत गर्नुभएको थियो भने अर्थमन्त्री डा. युवराज खतिवडाले आगामी योजनाका बारेमा टिप्पणी गर्नुभएको थियो ।
बैठकमा प्रधानमन्त्री ओलीले रोजगारी सृजना नगरी गरिवी निवारण गर्न नसकिने भन्दै रोजगारी उपलब्ध हुने योजनाहरु कार्यान्वयनमा ल्याउनुपर्ने बताउनुभयो । १५औं योजना आगामी ५ वर्षका लागि तयार पारिएको हो । गत जेठमा यसको आधारपत्र पारित भएको थियो ।
१५ औं योजनामा ’समृद्ध नेपाल, सुखी नेपाली’ बनाउने राष्ट्रिय लक्ष्यलाई पूरा गर्ने गरी २५ वर्षे दीर्घकालीन सोचसहितका कार्यक्रम समावेश गरिएको छ ।
वि.सं.२०७६ फागुन १९ सोमवार १३:१७ मा प्रकाशित
