काठमाडौं । डेनमार्कमा हिजो बुधबार मात्रै चार सय बयालिस जना कोरोना भाइरसका नयाँ संक्रमित फेला परेका छन् ।कोरोनाको संक्रमण रोकथामका लागी भन्दै युरोपेली मुलुक डेनमार्कले आफ्ना सम्पुर्ण शैक्षिक संस्थाहरु बन्द गर्ने घोषणा गरेको छ । यसका साथै अन्यावश्यक काम बाहेक घरबाहिर निस्कन रोकथाम लगाउनुका साथै सार्वजनिक स्थलहरुमा सभा सम्मेलन गर्न समेत प्रतिबन्ध लगाएको छ । आफ्नै घरभित्र पनि धेरै मानिसहरु जम्मा भएर गर्ने क्रियाकलाप नगर्नका लागि सरकारले आग्रह गरेको छ ।
युरोपेली मुलकहरुमध्ये इटलीले यसअघि नै प्रतिबन्ध लगाइसकेको छ । हालसम्मको तथ्यांकअनुसार सबैभन्दा बढी प्रभावित युरोपेली मुलुक इटली हो । इटलीमा मात्रै ८ सय २७ जनाको मृत्यु भएको छ भने १२ हजार १ सय ४९ जना संक्रमित छन् । युरोपमा कोरोना भाइरसबाट संक्रमितको संख्या २२ हजार नाघिसकेको छ ।
एक तथ्यांक अनुसार युरोपेली मुलकमा मात्र कोरोना भाइरसको संक्रमणबाट ९५१ जनाको मृत्यु भइसकेको छ भने २३ हजार ३३९ जनामा संक्रमण रहेको पुष्टि भएको छ ।
कोरोना भाइरसको संक्रमण रोकथाम गर्ने उपायस्वरुप अमेरिकाले शुक्रबार मध्यरातिबाट लागु हुने गरी बेलायत बाहेकका सबै युरोपेली मुलुकबाट अमेरिका यात्रामा प्रतिबन्ध लगाउने घोषणा अमेरिकी राष्ट्रपति डोनाल्ड ट्रम्पले गरेका छन् ।
वि.सं.२०७६ फागुन २९ बिहीवार १४:३९ मा प्रकाशित
