काठमाडौं । चीनबाट नेपालले किनेर ल्याएक अत्यावश्यक स्वास्थ्य सामग्री बोकेको नेपाल वायु सेवा निगमको विमान काठमाडौं आइपुगेको छ ।
अत्यावश्यक १२.६६ टन स्वास्थ्य सामग्री बोकेको विमान आइतवार बिहान ५ बजे नेपाल त्रिभुवन अन्तराष्ट्रिय विमानस्थलमा अवतरण गरेको हो ।
शनिवार दिउसो १२ बजे स्वास्थ्य सामग्री ल्याउन चीनका लागि नेपालबाट गएको वायु सेवाको एनएसी ए ३३०(२४३ विमान राती आइपुग्ने भनिए पनि लोड गर्न समय लागेका आज बिहान मात्रै आइपुगेको त्रिभुवन अन्तराष्ट्रिय विमानस्थलका महानिर्देशक देवेन्द्र केसीले जानकारी दिएका छन् ।
महामारीसँग जुध्न स्वास्थ्य सामग्री र औषधीको अभाव हटाउन सरकारले १३ चैतमा चीनमा नेपाली व्यापारीहरुले किनेर तयार पारेका स्वास्थ्य उपकरण र परीक्षण किट लिन नेपाल वायुसेवा निगमको विमान ग्वान्झाओ पठाउने निर्णय गरेको थियो ।
त्यस्तै कोरोनाभाइरस (कोभिड-१९) नियन्त्रण तथा रोकथामका लागि चीनले सहयोग गरेको अत्यावश्यक स्वास्थ्य सामग्री सहित चिनियाँ विमान नेपाल प्रस्थान गरेको छ ।
चीन सरकार र ज्याक माले उपलब्ध गराएको स्वास्थ्य सामग्री बोकेको विमान नेपालस्थित चिनियाँ राजदूतावासको विशेष सक्रियतामा गोञ्जावबाट छुटेको नेपालका लागि चिनियाँ राजदूत होउ यान्छीले जानकारी दिएकी छन् ।
“चीनको सिचुवान प्रान्त सरकार, सिचुवान इन्भेष्टमेन्ट ग्रुप र चिनियाँ दूतावसले नेपाललाई सहयोग गरेको पीपीई र थर्मो्मिटरलगायत अत्यावश्यक स्वास्थ्य सामग्री चिनियाँ दूतावासको सक्रिय सहकार्यमा गोञ्जावबाट नेपाल प्रस्थान गरेको छ, छिट्टै पुग्ने छ“ राजदूत यान्छीले भनेकी छन् ।
वि.सं.२०७६ चैत १६ आइतवार ०७:५८ मा प्रकाशित