एजेन्सी । बेलायतमा कोभिड–१९ को कहर जारी छ र त्यहाँ एक हजार १९ जनाको मृत्यु भइसकेको छ । सोमवारदेखि देशमा तीन हप्ताको बन्दाबन्दी लगाइएको छ ।
तर, मानिसहरूले अटेरी गरेर घरबाट निस्कने गरेको अनि सामाजिक दूरीको पालन राम्ररी नगरेको पाइएपछि लकडाउन १२ हप्तासम्म लम्ब्याउन सकिने आकलन गरिएको छ ।
राजकुमार चार्ल्स, प्रधानमन्त्री बोरिस जोनसन र हेल्थ सेक्रेटरी म्याट ह्यानककमा कोरोनाभाइरस पोजिटिभ भेटिएको छ । स्वास्थ्य सेवा, सामाजिक स्याहार, औषधि पसल, प्रहरी र दमकल सेवा बाहेक सबै सार्वजनिक र निजी कार्यालय बन्द गरिएको छ ।
सामाजिक दूरी अपनाउनका लागि लगाइने प्रतिबन्ध १२ हप्तासम्म तन्काउन सकिने बताइएको छ । सबै अनावश्यक यात्रालाई रोकिएको छ । बेलायत आउनेजाने ९० प्रतिशत उडान रद्द गरिएको छ । सबै विद्यालय मार्च २० बाट नै बन्द गरिएका छन् ।
बेलायतको राष्ट्रिय स्वास्थ्य सेवा (एनएचएस) स्वास्थ्य परीक्षण गराउन, अस्पताल तयार पार्न र समुदायमा भाइरस फैलिनबाट रोक्नका लागि संघर्ष गरिरहेको छ ।
अस्पतालका ओपीडीहरू लगभग बन्द छन् । बिरामीहरूलाई टेलिफोन वा भिडियो कन्फरेन्सिङमार्फत परामर्श लिन भनिएको छ । कम जरूरी शल्यक्रिया बन्द गरिएका छन् ।
सबै अस्पतालमा कोभिड–१९ एरिया र आइसोलेसन एक्सन प्लानका साथै शय्याहरूको व्यवस्था गरिएको छ । आईसीयूलाई इन्टेन्सिभ ट्रमा युनिटमा परिवर्तन गर्नका लागि सबै आवश्यक उपकरण उपयोग गरिँदैछ । तैपनि कतिपय अस्पतालले पर्याप्त मात्रामा व्यक्ति सुरक्षा उपकरण स्वास्थ्यकर्मीहरूलाई दिन सकेका छैनन् ।
प्रहरीले कडीकडाउ गरिरहेको छ । अनावश्यक रूपमा बाहिर निस्कनेमाथि एक हजार पाउन्डको जरिवाना लगाइएको छ । सुपरमार्केटमा सामानहरू सकिँदै गएपछि मानिसहरूलाई समझदारी अपनाएर खरिद गर्न आग्रह गरिएको छ ।
कोरोनाका कारण काम गर्न जान नपाएर तलब खान समस्यामा परेकालाई अर्थमन्त्री ऋषि शुनकले तलबको ८० प्रतिशतसम्म दिने हिसाबमा आर्थिक प्याकेज स्वीकृत गरेका छन् ।
तर आगामी केही महिनासम्म यस महामारीले कस्तो रूप लिने हो भन्ने चिन्ता कायम छ । भाइरस पूरै संसारबाट नहराएसम्म जोखिम कायमै रहने विशेषज्ञहरूको राय छ ।
वि.सं.२०७६ चैत १६ आइतवार १३:५८ मा प्रकाशित