एजेन्सी । अमेरिकाको न्युयोर्क राज्यका गभर्नरले यहाँका अत्यावश्यक बाहेकका व्यवसाय, प्रतिष्ठानहरु र विद्यालयहरु मे १५ अर्थात जेठ २ गतेसम्म नखुल्ने बताएका छन् ।
यी क्षेत्रहरु अहिले पनि बन्द रहेका र आगामी मे १५ सम्म नै नखुल्ने जानकारी गभर्नर एन्ड्रयु कुओमोले जानकारी दिएका हुन् । बिहीबार उनले संयुक्त राज्य अमेरिकाले कोविड १९ को संक्रमणलाई रोक्ने प्रयासस्वरुप यो निर्णय गरिएको जानकारी दिएको समाचारमा जनाइएको छ ।
कुओमोले नियमित पत्रकार सम्मेलनका क्रममा बिहीबार यो जानकारी दिएका थिए । साथै उनले न्युयोर्क वरिपरिका राज्यहरुसँग पनि आवश्यक परामर्श गरेर यो निर्णय लिइएको जानकारी गराए ।
उनले पछिल्ला केही दिनहरुमा यस राज्यमा कोभिड(१९ का कारणले भर्ना हुन आउने तथा आइसियुमा राख्नुपर्ने अवस्थाका विरामीहरुको संख्या घट्दो मात्रामा रहेको जानकारी पनि दिए । तर पनि अहिले नै उद्योग कारखाना तथा सबै बजार खुल्न मिल्ने अवस्था भने नरहेकोले सतर्कता अपनाउन पनि न्युयोर्कका गभर्नरले सबैसँग अपिल गरेका छन् ।
उनले आगामी केही हप्तामा अवस्था नियन्त्रणमा आउने भन्दै छिमेकी राज्यहरुसँगको परामर्शबाट बजार तथा विद्यालय खोल्नेसम्बन्धी निर्णय जतिसक्दो चाँडै गर्ने पनि बताएका छन् । अमेरिकामा कोरोना भाइरस (कोभिड–१९) बाट मृत्यु हुनेको संख्या ३६ हजार भन्दा माथि रहेको अवस्थामा गभर्नरको यो भनाइ आएको हो ।
अमेरिकामा संक्रमितको संख्या विश्वको अरु देशका तुलनामा सबैभन्दा बढी रहेको छ । अमेरिकामा यो भाइरसको कारण मृत्यु हुनेको संख्या ३६ हजार नाघिसकेको छ । नेपाली समयानुसार शुक्रबार अपरान्हसम्म अमेरिकामा यो भाइरसबाट संक्रमित हुनेहरुको संख्या ६ लाख ७८ नाघेको छ ।
वि.सं.२०७७ वैशाख ५ शुक्रवार १४:५४ मा प्रकाशित