नयाँ दिल्ली । भारतमा र्यापिड टेस्टबाट कोरोना भाइरसको परीक्षणमा रोक लगाइएको छ। केन्द्रीय गृह मन्त्रालय, स्वास्थ्य मन्त्रालय र आईसीएमआरको तर्फबाट मंगलबार भएको संयुक्त पत्रकार सम्मेलनमा आगामी दुई दिनका लार्गि र्यापिड टेस्ट किटबाट कोरोना परीक्षणमा रोक लगाएको जानकारी गराइएको हो ।
आईसीएमआरका डा. रमन गंगाखेडकरले विभिन्न राज्यमा र्यापिड टेस्ट किटबाट लिइएको परीक्षणमा नतिजा फरक-फरक आएपछि यसको विश्वसनीयतामा प्रश्न उठेको बताए । उनले यसलाई ध्यानमा राख्दै आगामी दुई दिनका लागि यापिड टेस्ट नगर्न भनिएको जानकारी गराए। आईसीएमआरले ती राज्यमा आफ्नो टोली पठाउन लागेको उनले बताए ।
उनका अनुसार गहन छानबिनपछि आईसीएमआरले परीक्षणका लागि निर्देश जारी गर्नेछ। डा. गंगाखेडकरले हालसम्म देशमा करोना भाइरसको ४ लाख ४९ हजार ८१० परीक्षण भएको बताए। हिजो मात्रै ३५ हजार परीक्षण भएको थियो ।
स्वास्थ्य मन्त्रालयका सहसचिव लव अग्रवालले पछिल्लो २४ घन्टामा ७०५ जना निको भएको जानकारी दिए। देशमा अहिलेसम्म ३,२५२ बिरामी निको भएको उनले बताए।
वि.सं.२०७७ वैशाख ९ मंगलवार १८:१८ मा प्रकाशित