काठमाडौं । कोभिड– १९ भाइरसको संक्रमण र पछिल्लो समय बागमती प्रदेशका जिल्लाहरूमा पारेको प्रभावबारे प्रदेश सरकारले १३ वटै जिल्लाका प्रमुख जिल्ला अधिकारीसँग ‘भर्चुअल कन्फ्रेन्स’ गरेको छ ।
बिहीबार मुख्यमन्त्री डोरमणि पौडेल, आन्तरिक मामिला तथा कानुनमन्त्री शालिकराम जमकट्टेल र मन्त्रालयका सचिव विनोद सिंहले १३ वटै जिल्लाका प्रमुख जिल्ला अधिकारीसँग जिल्लाको पछिल्लो वस्तुस्थितिबारेमा जानकारी लिन छलफल गरेका हुन् ।
आन्तरिक मामिला तथा कानुनमन्त्री जमकट्टेलका अनुसार समग्रमा तीन महिनाका लागि खाद्यान्न भण्डारण रहेको, गुणस्तरीय स्वास्थ्य सामग्री, मल र बिउको अभाव रहेको, काठमाडौंबाट जिल्लामा जानेको चाप बढेको, संक्रमणको चुनौती रहेको, नेपाल प्रहरीको दरबन्दी थोरै रहेको, आयोजना सञ्चालन गर्न प्रस्ट निर्देशन नआएको, क्वारेन्टाइन र आइसोलेसनमा बिरामीको चाप नरहेको, काठमाडौंबाट फर्केका मजदुरको सहजीकरण गरिएको, रासन वितरण भइरहेको सिडिओहरूले प्रदेश सरकारलाई जानकारी गराएका छन् ।
प्रदेश सरकारबाट जिल्ला विपत् व्यवस्थापन समितिका लागि पठाइएको रकम खर्च गर्न प्रस्ट कार्य्विधि नभएकाले अप्ठ्यारो परेको सिडिओहरूले गुनासो गरेका छन् । बिहान ८ बजेदेखि ११ बजेसम्म भएको छलफलमा मुख्यमन्त्री पौडेलले सिडिओहरूबाट राखिएका समस्या सम्बोधन गर्न प्रदेश सरकार गम्भीर रहेको बताउनुभयो ।
वि.सं.२०७७ वैशाख ११ बिहीवार २१:०८ मा प्रकाशित
