एजेन्सी । दक्षिण कोरियामा कोरोना भाइरसको नयाँ संक्रमण शून्यमा झरेको छ । चीनको वुहानपछि कोरोना संक्रमणको केन्द्रबिन्दु मानिएको दक्षिण कोरियामा ७५ दिनपछि स्थानीय संक्रमण शून्यमा झरेको हो ।
दक्षिण कोरियाले कोरोना भाइरसको नियन्त्रणका लागि उल्लेख्य कदम चालेको थियो । पहिलोपटक २० जनवरीमा एक महिलामा दक्षिण कोरियामा कोरोना संक्रमण देखिएको थियो । त्यसको केही दिनपछि ४ फेब्रुअरीमा विदेशीहरूलाई आउनबाट रोक लगाएको थियो ।
मार्च २ मा दक्षिण कोरियामा चार हजारभन्दा बढी मानिस संक्रमित भइसकेका थिए । तीमध्ये ६० प्रतिशत संक्रमित एक चर्चसँग आबद्ध थिए । अर्थात् एक चर्चमा सहभागी हुन पुगेका व्यक्तिहरूमा कोरोना संक्रमित हुन पुगेको थियो ।
त्यसक्रममै दक्षिण कोरियाले तीव्र रूपमा परीक्षण एवं कन्ट्याक्ट ट्रयासिङ गरेको थियो । अप्रिलको सुरुतिरबाटै दक्षिण कोरियामा कोरोना नियन्त्रण नजिक आउन सुरु भएको थियो ।
अप्रिल १५ मा महामारीबीच त्यहाँ चुनावसमेत भयो । त्यसैले २२ अप्रिलमा स्थानीय रूपमा नयाँ संक्रमितको संख्या कम हुँदै गएपछि लकडाउन खुकुलो पार्न सुरु भएको थियो ।
अप्रिल ३० अर्थात् आज पहिलो कोरोना संक्रमित भेटिएको ७५ दिनपछि त्यहाँ नयाँ संक्रमित नदेखिएको हो । अर्थात् नयाँ संक्रमण शून्यमा झरेको हो ।
अहिलेसम्म दक्षिण कोरियामा १० हजार सात सय ६५ मानिस संक्रमित भइसकेका छन् । संक्रमितमध्ये करिब नौ हजार निको भइसकेका छन् भने १४ सय उपचारको क्रममा रहेका छन् । दुई सय ४७ जनाको मृत्यु भएको छ ।
कोरोना भाइरसबाट विश्वभर कुल ३२ लाखभन्दा बढी मानिस संक्रमित भएका छन् । त्यसमध्ये करिब १० लाख निको भइसकेका छन् भने दुई लाख २८ हजारको मृत्यु भएको छ ।
वि.सं.२०७७ वैशाख १८ बिहीवार १४:१९ मा प्रकाशित
