काठमाडौं । कुवेतमा थप १३ जना नेपालीमा कोरोना संक्रमण पुष्टि भएको छ । बिहीबारसम्ममा कुवेतमा कोरोना संक्रमित नेपालीको संख्या ६४ पुगेको कुवेतका लागि नेपाली राजदूत दुर्गाप्रसाद भण्डारीले जानकारी दिनुभयो ।
मंगलबारसम्ममा ५१ नेपालीमा कोरोना संक्रमण देखिएको थियो । संक्रमित सबैको कुवेत सरकारले आफ्ना नागरिक सरह नै उपचार गरिरहेको र अवस्था सामान्य रहेको राजदूत भण्डारीले बताउनुभयो ।
कुवेतमा अहिलेसम्म ४ हजार २४ जनामा कोरोना संक्रमण भएको छ । जसमध्ये १५ सय ३९ जना निको भएका छन् भने २४ सय ५९ जनाको अस्पतालमा उपचार भइरहेको छ । कुवेतमा अहिलेसम्म २६ जनाको कोरोनाका कारण ज्यान गएको छ ।
वि.सं.२०७७ वैशाख १८ बिहीवार २०:०८ मा प्रकाशित