दमौली । व्यास नगरपालिकाले बजार खुलाउने तर साना सवारी नचलाउने निर्णय गरेको छ। नगरपालिकाको विपद् व्यवस्थापन समितिको बैठकले यस्तो निर्णय गरेको हो ।
यसअघिको निषेधाज्ञाको म्याद शुक्रबार सकिएपछि अब थप गर्ने कि नगर्ने भन्ने विषयमा बैठकमा छलफल भएको थियो । ’छलफलमा सहभागी धेरै व्यापारीले बजार खुलाउन माग गरेपछि जोखिम कम गर्दै खुलाउने सहमति भएको छ, ’छलफलमा सहभागी तनहुँ उद्योग वाणिज्य संघ दमौली बजार एकाई समितिका सभापति राजकुमार श्रेष्ठ ‘राकु’ले भने ।
बैठकमा एक साताका लागि बजार बिहान ८ देखि साँझ ६ बजेसम्म खुलाउने निर्णय भएको छ । आसपासका क्षेत्र र बजारभित्रै पनि संक्रमित भेटिने क्रम नघटेकाले अब बजार खुलाउँदा विशेष सावधानी अपनाउने निर्णय गरिएको उनले बताए । ’बजारमा ग्राहकलाई अनिवार्य मास्क लगाएर आए मात्र सामान बिक्री गर्ने अनि आफूले पनि मास्क र स्यानिटाइजरको व्यवस्था गर्ने सहमति भएको छ,’ उनले भने ।
व्यासमा हालसम्म ४१ जनामा संक्रमण देखिएको छ । व्यासमा बस्ने भानु र म्याग्देका अरु दुईजनामा पनि संक्रमण देखिएको थियो । छिमेकका तहबाट संक्रमित बढी आउन थालेकाले बजारको केही तप्काबाट अझ बजार बन्द गराउनुपर्ने माग आए पनि सटर भाडामा बस्ने अधिकांशले भने यसमा बिमति जनाएका थिए ।-अन्नपूर्ण पोष्ट अनलाइनबाट
वि.सं.२०७७ भदौ १२ शुक्रवार १३:४६ मा प्रकाशित
