काठमाडौं । गृह मन्त्रालयले काठमाडौं उपत्यकामा जारी निषेधाज्ञा तत्कालका लागि केही खुकुलो बनाएर जाने तयारी गरेको छ। सुरक्षा मापदण्ड अपनाए लकडाउन केही खुकुलो बनाउने प्रशासनको तयारी रहेको गृहमन्त्रालयका प्रवक्ता चक्रबहादुर बुढाले जानकारी दिए ।
तत्कालै लकडाउन खोल्न सकिने वातावरण नभएको हुँदा पहिलो चरणमा अलि खुकुलो बनाएर जाने तयारी रहेको उनको भनाइ थियो ।उनका अनुसार सबैतिर बजार खुकुलो बनाउने सुझाव पनि आएको हुनाले तत्कालको लागि प्रशासनले निषेधाज्ञा खुकुलो बनाउने तयारी गरेको छ ।
उपत्यकामा फेरि कम्तीमा सात दिन निषेधाज्ञा थपिए पनि पहिलाभन्दा केही खुकुलो हुने उनले जनाए । भदौ ३ गतेदेखि काठमाडौं उपत्यकामा निषेधाज्ञा जारी छ । जारी निषेधाज्ञाको समय बुधबार राति १२ बजे सकिँदैछ ।
निषेधाज्ञा समयको पूर्वसन्ध्यामा काठमाडौं, भक्तपुर र ललितपुर जिल्लाका प्रमुख जिल्ला अधिकारीहरू निषेधाज्ञाको समय बढाउने÷नबढाउने बारेमा छलफलमा जुटेका हुन् ।
आज हुने तीन जिल्लाका प्रजिअको छलफलको राय आजै गृह मन्त्रालयमा पठाइनेछ । गृहको सहमतिपछि भोलि फेरि निषेधाज्ञाबारे थप काम अगाडि बढाइनेछ । उपत्यकामा कोरोना संक्रमण धेरै बढ्न थालेपछि गृहको समन्वयमा स्थानीय प्रशासनले निषेधाज्ञा जारी गरेकोे थियो ।
वि.सं.२०७७ भदौ १६ मंगलवार १२:२५ मा प्रकाशित
