सन फ्रान्सिस्को (अमेरिका) । अमेरिकी सञ्चार प्रविधि कम्पनी जूमको मुनाफामा उच्च वृद्धि भएको छ । कम्पनीको भिडियो कन्फ्रेन्सिङ एपको प्रयोगमा भएको उच्च वृद्धिसँगै दोस्रो त्रैमासमा आम्दानी र मुनाफा दुवै बढेको हो ।
जुलाई ३१ सम्मको तीन महीनामा कम्पनीले ६६ करोड ३५ लाख डलर आम्दानी गरेको छ । आम्दानीको यो आकार गत वर्षको सोही अवधिको तुलनामा ३५५ प्रतिशत धेरै हो ।
समीक्षा अवधिमा कम्पनीले १८ करोड ६० लाख मुनाफा कमाएको छ । मुनाफाको यो आकार सन् २०१९ को सोही अवधिको तुलनामा ४५८ प्रतिशत धेरै हो ।
कोरोना भाइरसको महामारीबीच विश्वभर रिमोट वर्किङ बढेसँगै जूमको प्रयोग निकै बढेको छ । सोमवार शेयर बजार बन्द हुँदा जूमको शेयर मूल्य प्रतिकित्ता ३२५ डलर १० सेन्टको कीर्तिमानी उचाईमा पुगेको थियो ।
कम्पनीले यस वर्षको पूर्ण वार्षिक आम्दानी प्रक्षेपण २ अर्ब ३७ करोड देखि २ अर्ब ३९ करोड डलरसम्म पु¥याएको छ । यो यसअघि गरिएको प्रक्षेपणको तुलनामा ३० प्रतिशत धेरै हो । जूमको सफलतामा कारक शुल्क तिर्ने ग्राहकको संख्या थप्न सक्ने यसको क्षमता हो ।
पछिल्लो समय कोरोना भाइरसको संक्रमण फैलिन नदिन कयौं देशहरुले लकडाउन लागू गरेसँगै जूमको साथसाथै यसको प्रतिस्पर्धी एपहरु सिस्को वेबेक्स र माइक्रोसफ्ट टिम्सको प्रयोगमा उच्च वृद्धि भएको छ । एजेन्सी
वि.सं.२०७७ भदौ १६ मंगलवार १६:४९ मा प्रकाशित