काठमाडौं । सत्तारुढ नेपाल कम्युनिष्ट पार्टी (नेकपा) को सचिवालय बैठकमा मन्त्रिपरिषद पुनर्गठनको विषयले प्रवेश नै पाएन ।
मंगलबार प्रधानमन्त्री निवास बालुवाटारा बसेको बैठकले विभिन्न संवैधानिक आयोगमा नियुक्ति र पार्टी एकिकरण सम्पन्न गर्ने विषयमा छलफल भएपनि चर्चामा रहेको मन्त्रिपरिषद पुनर्गठनका विषयमा कुनै छलफल नभएको हो ।
“सचिवालयको आजको बैठकमा मन्त्रिपरिषद पुनर्गठनका बारेमा प्रधानमन्त्रीले कुनै जानकारी भएको छैन। दुई अध्यक्षबीच कुनै छलफल भइरहेको होला“, बैठकपछि प्रतिक्रिया दिँदै पार्टी प्रवक्ता नारायणकाजी श्रेष्ठले जानकारी दिनुभयो ।
श्रेष्ठले अनशनरत डा. गोविन्द केसीले चिकित्सा शिक्षा क्षेत्र सुधारका लागि राखेका मागहरू अधिकांश सम्झौता भइसकेको र केही विषयमा कार्यन्वयनमा गइसकेको निष्कर्षमा पुगेको बताउनुभयो ।
उहाँले कोरोना महामारीको बेला अन्य विषयमा छलफल गर्नु भन्दा अवस्था सामान्य भएपछि गर्न सकिने भन्दै अनशन अन्त्य गर्न अनुरोध गर्ने निर्णय भएको बताउनुभयो ।
वि.सं.२०७७ असोज २० मंगलवार १८:३२ मा प्रकाशित