सुर्खेत । सुर्खेतको पञ्चपुरी नगरपालिकाले टिकटक र फेसबुक चलाउन प्रतिबन्ध लगाएको छ। नगरपालिका कार्यालयभित्र कर्मचारीहरुलाई टिकटक र फेसबुक चलाउन प्रतिबन्ध लगाएको हो।
नगरपालिकाले कार्यालय हाताभित्र कुनै पनि कर्मचारीले फेसबुक र टिकटक चलाउन नपाउने नियम जारी गरेको छ । गत शुक्रबार बसेको नगर कार्यपालिकाको बैठकको निर्णयअनुसार नगरपालिकाका कर्मचारीले कार्यालय समयमा सामाजिक सञ्जाल फेसबुक, टुइटर, भाइबर, म्यासेन्जर, टिकटक चलाउन पाउने छैनन् ।
सामाजिक संजालमा कर्मचारी व्यस्त हुँदा सेवाग्राहीको काममा असर परेको जनगुनासो आएपछि यो निर्णय गरिएको नगरपालिका प्रमुख प्रशासकीय अधिकृत मोहनबहादुर बुढाले बताए ।
‘कर्मचारीले फेसबुकमा समय खर्च गरेको पाइएमा ‘स्पष्टिकरण’ मागिनेछ’ उनले भने,‘कार्यालयमा बसेर सरकारी पोसाकमै टिकटक बनाउने, फेसबुक, टिकटकमा पोष्ट गर्ने, काम भन्दा अन्य बिषयमा पोष्ट, कमेन्ट गर्ने जस्ता काम हुने गरेको हुँदा यो नियम लागु गरिएको हो ।’
वि.सं.२०७७ मंसिर २८ आइतवार १२:४० मा प्रकाशित