काठमाडौं । महिला लघुवित्त वित्तीय संस्था लिमिटेडले ४ करोड बराबरको आईपीओ निष्कासन गरेको छ ।
कम्पनीले प्रतिकित्ता १०० अंकित दरका ४ लाख कित्ता साधारण शेयर निष्कासन गरेको हो । निष्कासित कुल शेयरमध्ये जारी पूँजीको शून्य दशमलव ५ प्रतिशत अर्थात् ५ हजार कित्ता शेयर कर्मचारीहरुका लागि छुट्याइएको छ ।
त्यस्तै, सर्वसाधारणका लागि छुट्याइएको शेयरमध्ये ५ प्रतिशत अर्थात् २० हजार कित्ता शेयर सामूहिक लगानी कोषका लागि छुट्याएको छ भने सर्वसाधारणले बाँकी ३ लाख ७५ हजार कित्ता साधारण शेयरका लागि आवेदन दिन सक्नेछन् ।
आजदेखि खुला गरिएको आईपीओमा आज सार्वजनिक विदा परेकोले छिटोमा आगामी फागुन ५ गतेसम्म आवेदन दिन सकिने छ भने ढिलोमा फागुन १४ गतेसम्म आवेदन दिन सकिने छ ।
आवेदकले न्यूनतम १० कित्तादेखि अधिकतम १ हजार कित्तासम्मका लागि आवेदन दिन सक्नेछन् । कम्पनीको आईपीओ निष्कासन तथा विक्री प्रबन्धक नेपाल एसबिआई मर्चेण्ट बैंकिङ लिमिटेड रहेको छ ।
हाल कम्पनीको चुक्तापूँजी ६ करोड रहेको छ, आईपीओ निष्कासनपश्चात उक्त पूँजी १० करोड पुग्नेछ ।
वि.सं.२०७७ माघ ३० शुक्रवार १०:३७ मा प्रकाशित
