काठमाडौं । सोमबारको कारोबारमा बैंकिङ समूहमा पहिरो जाँदा सेयर बजारमा दोहोरो अंकको गिरावट देखिएको छ । सोमबार नेप्से मापन गर्ने सूचक ३२.६७ अंकले घटेर परिसूचक २६०७.६७ बिन्दुमा रोकिएको छ ।
नेप्से इन्डेक्स सँगै ठूला कम्पनीको कारोबार मापन गर्ने सेन्सेटिभ इन्डेक्स पनि ९.२२ अंकले घटेर ४७०.३६ बिन्दुमा रोकिएको छ । यो दिनको कारोबारमा लगानीकर्ताको ध्यान नाफा बुक गर्नेतर्फ देखिएको छ । २०७ कम्पनीको २ करोड १६ लाख १४ हजार ४५२ कित्ता सेयर ८ अर्ब ४० करोड ६३ लाख १० हजार ६७१ रुपैयाँमा किनबेच भएको छ । कारोबारमा सबै समूहको उपसूचकमा गिरावट आएपनि जलविद्युत समूह र अन्य समूहको परिसूचकमा सुधार देखिएको छ । यो दिन जलविद्युत कम्पनीका लगानीकर्ता मालामाल बनेका छन् । जलविद्युत ४५.८५ र अन्य समूहको उपसूचक २७.८६ अंकले बढेको छ भने बैंकिङ ५२.५५, विकास बैंक ६४.८५, निर्जीबन बीमा १०८.५१, माइक्रोफाइनान्स ५६.९५, जीवन बीमा समूहको उपसूचक ३५१.३४ अंकले घटेको छ ।
कारोबार रकमको आधारमा एनआईसी एसिया बैंक अग्रस्थानमा रहेको छ । बैंकको ३८ करोड २४ लाख ७५ हजार रुपैयाँ बढीको सेयर किनबेच भएको छ । दोस्रो र तेस्रो स्थानमा क्रमशः नेपाल इन्फ्रास्टक्चर बैंक, निर्धन उत्थान लघुवित्त वित्तीय संस्था रहेका छन् । सोमबारको कारोबारमा आँखुखोला जलविद्युत कम्पनी, नेपाल इन्फ्रास्टक्चर बैंकm नेपाल हाईड्रो डेभलपर्स कम्पनीको सेयर मूल्य १० प्रतिशतले बढेको छ ।
वि.सं.२०७७ फागुन १० सोमवार १५:१४ मा प्रकाशित