काठमाडौं । नेपाल उद्योग वाणिज्य महासंघका अध्यक्ष शेखर गोल्छाले अबको एक दशकभित्र मुलुकको अर्थतन्त्र १ सय अर्ब डलरको बनाउने र करिब २३ लाख थप रोजगारी सृजना गर्ने लक्ष्यका भिजन पेपरमा तयार भइरहेको बताउनु भएको छ ।
उहाले महासंघको यस लक्ष्यलाई पुरा गर्ने दिशामा सम्पूर्ण कामदार कर्मचारीहरूको पनि उत्तिकै सहयोग महासंघले खोजेको बताउनुभयो ।
महासंघ र संयुक्त ट्रेड युनियन समन्वय केन्द्र (जेटियुसीसी) का अध्यक्ष जगत सिम्खडाको नेतृत्वमा आएको प्रतिनिधिमण्डल बीच भेटमा यस्तो बताउनु भएको हो ।
भेटमा कोभिडका कारण मुलुकको उद्योग व्यवसाय लगायत श्रम बजारमा पर्न गएको समस्या, अप्ठेरो समयमा श्रमिक कामदार कर्मचारीहरूबाट पाएको सहयोगका विषयमा छलफल भयो ।
जेटियुसीसीका तर्फबाट रोजगारदाताहरूको संस्था नेपाल उद्योग वाणिज्य महासंघका अध्यक्ष गोल्छालाई न्यूनतम पारिश्रमिक कार्यान्वयनको आग्रह सहित ज्ञापन पत्र समेत बुझाइएको थियो ।
महासंघका अध्यक्ष गोल्छाले उद्योग व्यवसायमा कोभिडको असर अझै रहेको र पर्यटन, होटल लगायत केही उद्योगहरू अझै तङग्रन नसकेको बताउनुभयो । मुलुकभित्र श्रम सम्बन्धलाई अझ सुमधुर बनाउन महासंघ क्रियाशिल रहेको उहाले स्पष्ट पार्नुभयो ।
अध्यक्ष गोल्छाले लकडाउनको समयमा महासंघले जेटियुसीसीसंग नजिकमा रहेर काम गरेको भन्दै मुलुकभित्र श्रम सम्बन्धलाई थप मजवुद बनाउन महासंघ र जेटियुसीसी बीचको सहकार्यमा जोड दिनुभयो ।
वि.सं.२०७७ चैत १८ बुधवार १०:३८ मा प्रकाशित