काठमाडौँ । काठमाडौं महानगरपालिकाले बालाजुमा करिब १ करोड लागतमा सूचना केन्द्र निर्माण गर्ने भएको छ । काठमाडौँ महानगरपालिकाका प्रमुख विद्या सुन्दर शाक्यले केन्द्रको शिलान्यास गर्नुभएको छ ।
बाईपासमा निर्माण हुने सुचना केन्द्रले उत्तरी क्षेत्रबाट हुने आवागमनको लगत राख्नेछ । सूचना केन्द्रबाट बालाजुबाट बाहिरिँदा पुगिने ठाउँ र भित्र आउँदा आवश्यक पर्ने सेवा प्राप्त हुने ठाउँका बारेमा जानकारी दिइनेछ ।
‘काठमाडौँबाट बालाजु नाकाहुँदै बाहिरिने र भित्रिने सवारीको अभिलेखीकरण राख्ने, यातायातबारे सुचना राख्ने र सर्वसाधारणलाई काठमाडौँबारे जानकारी दिने उद्देश्यले सूचना केन्द्रको निर्माण गर्ने तयारी गरेका हौँ, ’ सहरी विकास राज्यमन्त्री रामविर मानन्धरले भन्नुभयो, ‘बाइपासलाई विवादित बनाउने प्रयास भएपनि अहिले जनताको जित भएको छ । सार्वजनिक जग्गा संरक्षण गर्नु सरकारको दायित्व हो । सार्वजनिक सम्पतिको संरक्षणमा सरकार सचेत छ ।’ कार्यक्रममाम उहाँले उपत्यकामा खानेपानी र फोहरको समस्या अब चाँडै दीर्घकालिन रुपमा समाधान हुने आश्वासान दिनुभयो ।
कार्यक्रममा महानगरका प्रमुख शाक्यले सूचना केन्द्रको निर्माणले राजधानीबाट ल्याण्डफिल्ड साइट जाने फोहरका गाडीको लागत राख्न सहयोग पुग्ने अपेक्षा रहेको बताउनुभयो । ‘सूचना केन्द्रमा उपत्यका र काठमाडौं महानगरसम्बन्धी आवश्यक सबै सुचना उपलब्ध गराइने छ,’ उहाँले भन्नुभयो, ‘सूचना केन्द्रबाट पर्यटक र सर्वसाधारणलाई काठमाडौं र उत्तरी क्षेत्रहुँदै पुगिने नुवाकोट रसुवा गोरखा जाने बाटो लगायतबारेमा पनि सूचना दिइनेछ ।’
कार्यक्रममा वडा–१६ का अध्यक्ष मुकुन्द रिजालले सूचना केन्द्रको निर्माण कार्य उपभोक्ता समितिमार्फत भइरहेको जानकारी गराउनु भयो । महानगरपालिकाको ९५ लाख ६० हजार र उपभोक्ताले १० लाख ६० हजार व्यहोर्ने उपभोक्ता समितिमा अध्यक्ष हरिओम मानन्धरले जानकारी दिनुभयो ।
वि.सं.२०७७ चैत १८ बुधवार १२:०५ मा प्रकाशित