काठमाडौं । प्रधानमन्त्री केपी ओलीले सङ्घ, प्रदेश र स्थानीय तहमा अवकाशप्राप्त चिकित्सक तथा अन्य स्वास्थ्यकर्मीलाई एक वर्षका लागि करारमा भर्ना गरिने बताउनु भएको छ । उहाँले स्वास्थ्य जनशक्तिको अभाव हुन नदिन एक वर्षका लागि करारमा भर्ना गर्न लागेको जानकारी गराउनु भएको हो ।
उहाँले कोभिड–१९ को पहिचान, निदान, उपचार, बिरामीको ओसारप्रसार र शव व्यवस्थापनमा प्रत्यक्ष रूपमा संलग्न चिकित्सक, स्वास्थ्यकर्मी, चालक तथा सहचालक र सफाइकर्मीका साथै कर्मचारीहरूलाई शुरु तलब स्केलको ५० प्रतिशत जोखिम भत्ता, परिवारको उपचार र बिमाको व्यवस्था गरिनेछ बताउनु भएको छ ।
सोमबार सम्बोधन गर्दै प्रम ओलीले जनस्वास्थ्य मापदण्ड पालना गराउन सुरक्षाकर्मीलाई टोल, बस्ती, गल्ली तथा अन्य ठाउँमा परिचालन गरी २४ सैं घण्टा अनुगमन र निगरानी गरिने तथा मापदण्डको उल्लङ्घन गर्नेलाई कानुनबमोजिम दण्डित गरिने जानकारी गराउनु भयो ।
सङ्क्रमणको साङ्लो तोड्नको लागि जारी गरिएको निषेधाज्ञा तथा बन्दाबन्दीका कारण कसैलाई पनि भोकै पर्न नदिनेमा सरकार सचेत रहने र महामारी नियन्त्रण भएसंगै अर्थतन्त्र र रोजगारीका क्षेत्रलाई ध्वस्त हुन नदिन आवश्यक प्रबन्ध गरिने जानकारी गराउनु भयो ।
जनस्वास्थ्यका मापदण्ड पालनाको नेतृत्व गृह मन्त्रालयले र जनचेतनाको नेतृत्व सूचना तथा सञ्चार प्रविधि मन्त्रालयले गर्नेछन् । परीक्षण, उपचार तथा अन्य विषय स्वास्थ्य तथा जनसङ्ख्या मन्त्रालयले र खोप आयातको नेतृत्व परराष्ट्र मन्त्रालयले गर्ने समेत जानकारी गराउनु भयो ।
वि.सं.२०७८ वैशाख २० सोमवार १७:५६ मा प्रकाशित