काठमाडौं । नेपाली बजारमा छापावाला सुनको मूल्य २ हजार ५ सय रुपैयाँ बढेको छ । बैशाख १६ गते अर्थात निषेधाज्ञा सुरुभएको दिनदेखि आज (जेठ ७ गते) सम्मको तुलनामा सुनको मूल्यमा उक्त रकमले महंगिएको हो ।
नेपाल सुनचाँदी व्यवसायी महासंघका अनुसार निषेधाज्ञा लागू भएको दिन अर्थात वैशाख १६ गते छापावाला सुनको मूल्य तोलाको ९० हजार ८ सय रुपैयाँ कायम भएको थियो ।
उक्त दिन यता अर्थात जेठ ७ गते शुक्रावरसम्म सुनको मूल्य बढेर ९३ हजार ३ सय रुपैयाँ पुगेको महासंघले जनाएको छ । यद्यपि, अघिल्लो दिन अर्थात जेठ ६ गतेको तुलनामा भने आज सुनको मूल्यमा ४ सय रुपैयाँले गिरावट आएको हो ।
त्यसैगरि वैशाख १६ गते ९० हजार ३ सय रुपैयाँमा कारोबार भएको तेजावी सुन जेठ ७ गतेसम्म आईपुग्दा बढेर ९२ हजार ८ सय रुपैयाँ पुगेको छ ।
यस्तै, निषेधाज्ञा सुरुभएदेखि यता चाँदीको मूल्य पनि वृद्धि भएको छ । उक्त अवधिमा प्रतितोला ३५ रुपैयाँले वृद्धि भएको महासंघले जनाएको छ । वैशाख १६ गते तोलाको १३ सय १५ रुपैयाँमा खरिदबिक्री भएको चाँदी जेठ ७ गतेसम्म आउँदा बढेर १३ सय ५० रुपैयाँ पुगेको छ ।
वि.सं.२०७८ जेठ ७ शुक्रवार ११:२३ मा प्रकाशित
