काठमाडौं । चालु आर्थिक वर्षको पछिल्लो १० महिनामा साढे ८ करोड बढीको फेश सिल्ड आयात भएको छ ।
भन्सार विभागका अनुसार बैशाख मसान्तसम्म ८ करोड ५८ लाख ५६ हजार रुपैयाँ बराबरका मेडिकल सर्जिकल फेश सिल्ड तथा अन्य फेश सिल्ड आयात भएको हो ।
कोरोना संक्रमण फैलिँदै गएपछि यसको आयात पनि बढेको विभागले जनाएको छ । नेपालमा छिमेकी मुलुक चीन, भारत जापान, अष्ट्रेलिया, कतार, स्वीडेन, बेलायत, अमेरिका, कोरिया लगायतका देशहरुका आयात हुने गरेको छ ।
चालु आवको पछिल्लो १० महिनाको अवधिमा सबैभन्दा धेरै मेडिकल सर्जिकल फेश सिल्ड चीनबाट आयात भएको छ । उक्त देशबाट ७ करोड ६७ लाख ८७ हजार रुपैयाँ बराबरको मेडिकल सर्जिकल तथा अन्य फेश सिल्ड आयात भएको छ । चीनबाट ३३ लाख २८ हजार ५०३ थान मेडिकल सर्जिकल तथा अन्य फेश सिल्ड आयात भएको विभागले जनाएको छ ।
यस्तै, सोही अवधिमा भारतबाट ६० लाख ६० हजार रुपैयाँ बराबरको २ लाख २४ हजार ६३५ थान, जापानबाट १८ लाख ३४ हजार रुपैयाँ बराबरको २ हजार थान, अष्ट्रेलियाबाट ९ लाख २८ हजारको ५५ थान, स्वीडेनबाट १ लाख ५७ हजारको ५६४ थान, कतारबाट ४७ हजार रुपैयाँ बराबरको ४ हजार थान फेश सिल्ड आयात भएको छ ।
त्यसैगरि क्यानडा, केन्या, बेलायत अमेरिका, कोरिया फिलिफिन्स लगायतका देशबाट ५० हजार रुपैयाँ बराबरको १६५ मेडिकल सर्किकल तथा अन्य फेश सिल्ड आयात भएको विभागले जनाएको छ ।
वि.सं.२०७८ जेठ १७ सोमवार १३:४४ मा प्रकाशित
