काठमाडौं । नेपाल प्रहरीको सक्रियतामा देशभरका विभिन्न स्थानबाट १० हजार ५४५ वटा सिलिन्डर सङ्कलन गरी कोभिड अस्पताल, स्वास्थ्य कार्यालय र सम्बन्धित अक्सिजन प्लान्ट उद्योगलाई उपलब्ध गराएको छ ।
नेपाल प्रहरीको सक्रियतामा वैशाख २६ गतेदेखि हालसम्म उक्त सिलिन्डर संकलन भएको हो । सङ्कलन गरिएका सबै सिलिन्डर कोभिड अस्पताल र जिल्ला स्वास्थ्य कार्यालयलाई उपलब्ध गराइएको छ ।
आवश्यकता भन्दा बढी अक्सिजन सिलिन्डर होल्ड गर्ने व्यक्ति, विभिन्न संघ संस्था तथा स्वास्थ्य प्रयोजन बाहेक अन्य प्रयोजनमा प्रयोग गर्ने उद्देश्यले विभिन्न उद्योग, कलकारखाना, कवाडी, ग्यास वेल्डिङ, पसल तथा गोदामहरूमा स्टक गरी राखेका अक्सिजन सिलिन्डर सङ्कलन गरी उपलब्ध गराइएको प्रहरीको भनाइ छ ।
अन्य प्रयोजनका लागि स्टक नगर्न तथा विभिन्न कम्पनी, संघ संस्था तथा व्यक्तिहरूसँग आवश्यकता भन्दा बढी सिलिन्डर छन् भने त्यस्ता सिलिन्डरहरू उपलब्ध गराई सहयोग गर्न समेत प्रहरीले अनुरोध गरेको छ ।
वि.सं.२०७८ जेठ १९ बुधवार ०९:५१ मा प्रकाशित