काठमाडौं । कोरोना महामारीका कारण बैंकमा कर्जाको माग घटन थाल्दा निक्षेप संकलन भने बढिरहेको छ ।
नेपाल बैंकर्स संघका अनुसार एक साताको अवधिमा बैंक तथा वित्तीय संस्थामा निक्षेप संकलन १३ अर्ब रुपैयाँले बढेको छ भने कर्जा लगानीको माग जम्मा ८ अर्ब रुपैयाँले मात्रै बढेको छ ।
जेठ तेस्रो साता बैंकहरुमा ३९ खर्ब ६९ अर्ब निक्षेप संकलन भएकोमा चौथो साता आईपुग्दा ३९ खर्ब ८२ अर्ब रुपैयाँ पुगेको छ । एक साताको अवधिमा बैंकमा १३ अर्ब रुपैयाँ निक्षेप भित्रीएको छ ।
संघका अनुसार पछिल्लो साता कर्जाको माग भने घटेको छ । जेठ तेस्रो साता ३६ खर्ब ३४ अर्ब रुपैयाँ रहेको कर्जा लगानी एक साताको अवधिमा ८ अर्ब रुपैयाँले थपिएर ३६ खर्ब ४२ अर्ब रुपैयाँ पुगेको छ ।
कोरोनाका कारण सरकारले जारी गरेको निषेधाज्ञाका कारण बैंकहरुमा कर्जाको माग घटेको देखिएको छ । यसअघि लकडाउन खुकुलो भएसँगै बैंकहरुमा निक्षेप संकलनको तुलनामा कर्जाको माग निकै बढेको छ । निषेधाज्ञाले आर्थिक क्षेत्र ठप्प हुँदा कर्जाको माग पनि खुम्चन थालेको देखिएको छ ।
वि.सं.२०७८ जेठ ३१ सोमवार १७:२० मा प्रकाशित