काठमाडौं । नेपाल धितोपत्र बोर्डले प्रि–ओपन सेसनमा मूल्य सीमा परिवर्तन गरेर २ प्रतिशत कायम गरेको छ ।
बोर्डका अनुसार हाल कायम रहेको ५ प्रतिशतलाई घटाएर २ प्रतिशत कायम गरिएको छ । बोर्डको यो व्यवस्था अनुसार प्रिओपन सेसनमा २ प्रतिशत तलमाथि गरेर मात्रै सेयर खरिद-बिक्री गर्न पाइने छ ।
बोर्डले दोस्रो बजार कारोबार हुँदा हाल न्यूनतम मूल्य परिवर्तन सीमा १ रुपैयाँबाट घटाएर १० पैसा कायम गरेको छ । प्रारम्भिक सत्रमा कारोबार भएको धितोपत्र मूल्यमा भइरहेको अस्वभाविक उतार चढावलाई व्यवस्थित गर्नुपर्ने देखिएको भन्दै उक्त सत्रमा हुन गरेको धितोपत्रको कारोबार मूल्य परिवर्तन सीमालाई घटाएको बोर्डले जनाएको छ ।
यो व्यवस्था कार्यान्वयनमा आएपछि कारोबार सत्र थप व्यवस्थित हुने र न्यूनतम मूल्य परिवर्तन सीमा १० पैसा हुँदा लगानीकर्ताले प्रतिस्पर्धा गर्न सक्ने र दोस्रो बजार कारोबार थप लगानीकर्ता मैत्री हुने बोर्डले विश्वास लिएको जनाएको छ ।
वि.सं.२०७८ असार १० बिहीवार १४:११ मा प्रकाशित