काठमाडौं । सेयर बजारमा दीर्घकालीन लगानीकर्ता कम हुने र अल्पकालीन लगानीकर्ता हावी हुने देखिएपछि सरकारले सोही अनुसार पुँजीगत लाभकर लगाएको छ । जुन साउन १ गतेबाट कार्यान्वयनमा आउने छ ।
बजारमा अल्पकालीन लगानीकर्ता हावी भएपछि बढी कर लिने सकिने रणनीतिका साथ सरकारले साउन १ गतेबाट लागु हुनेगरी दुई भागमा वर्गिकरण गरेर पुँजीगत लाभकर लिने भएको हो ।
सरकारले आगामी आर्थिक वर्षबाट अल्पकालिन र दिर्धकालिन निर्धारण गरेर कर लगाउने भनेपछि सिडिएससी त्यसको लागि सिस्टम बनाउन लागेको छ ।
अर्थमन्त्री बिष्णु पौडेलले आगामी आवको बजेटमा सेयर लगानीकर्तालाई अल्पकालिन र दीर्घकालिन छुट्याउने र सोही अनुसार लाभकर लगाउने घोषणा गरेको छ । सरकारले आयकर ऐन संशोधन गर्दै एकवर्ष कम अवधीमा सेयर बेच्ने लगानीकर्तालाई ७.५ प्रतिशत पूँजीगत कर लगाउने र एकवर्षभन्दा बढी समय पछि मात्रै सेयर बेच्नेलाई ५ प्रतिशत पूँजीगत लाभकर लगाउने नीति लिएको छ । त्यसको लागि अहिले सिडिएससीले सिस्टम बनाउने काम गरिरहेको बताइएको छ ।
अहिलेसम्म प्राकृतिक व्यक्तिले ५ प्रतिशत पुँजीगत लाभकर तिरी रहेका छन् । अब साउन १ गतेदेखि ३६५ दिन भन्दा अघि सेयर बिक्री गरेमा ७.५ प्रतिशत र ३६५ दिन भन्दापछि सेयर बिक्री गरेमा ५ प्रतिशत कर लाग्ने छ ।
लगानीकर्ताले आफूले किनेको सेयरको अवधि छुट्याउनको लागि सिडिएससीले मेरो सेयरमा आवश्यक फिचर थप्ने काम गरिरहेको प्रवक्ता सुरेश न्यौपानेले बताउनुभयो । साउन १ गतेदेखिको कारोबारबाट यो व्यवस्था लागु हुँदैछ । त्यसको लागि मेरो सेयरमा फिचर थप्ने काम भइरहेको उहाँको भनाई छ ।
वि.सं.२०७८ असार २१ सोमवार ११:५४ मा प्रकाशित