काठमाडौं । ज्योति विकास बैंक र नेपाल महिला उद्यमी महासंघ (एफवीन) बीच सहकार्यका लागि सम्झौता भएको छ ।
एफवीनमा आवद्ध व्यवसायी तथा त्यस्ता संस्थामा कार्यरत कर्मचारीहरुलाई विभिन्न बैंकिङ सेवा प्रदान गराउनका लागि सम्झौता भएको हो ।
आइतबार एक कार्यक्रमकाबीच ज्योति विकास बैंकका तर्फबाट बैंकका प्रमुख कार्यकारी अधिकृत श्रीचन्द्र भट्टर र नेपाल महिला उद्यमी महासंघका तर्फबाट अध्यक्ष रीता सिम्हाले सम्झौता पत्रमा हस्ताक्षर गर्नुभएको थियो ।
सम्झौता पश्चात बैंकले एफवीनमा आवद्ध व्यवसायीहरु तथा संस्थामा कार्यरत कर्मचारीहरुलाई विशेष छुटमा प्रोफेसनल लोन, कर्जा सेवाहरु र सहज वित्तिय सेवाहरु प्रदान गर्नेछ ।
साथै ज्योति विकास बैंकले एफवीन अन्तर्गतका व्यवसायीहरुलाई डिजिटल बैंकिंग सेवाहरु प्रदान गर्ने र सहजै सुचारु गरि व्यवसायमा लागू गर्न पनि सहयोग गर्नेछ ।
व्यवसायीहरुले डिजिटल भुक्तानीका सेवा आफ्नो व्यवसायमा भित्र्याई आफ्ना ग्राहकहरूलाई थप सुविधा उपलब्ध गराउन सक्ने छन् ।
यसका साथै बैंकले आधुनिक बैंकिङ्ग, वित्तिय साक्षरता,उद्यमशीलता विकासका निमित्त एफवीनसंगको सहकार्यमा विभिन्न कार्यक्रमहरु संचालनमा ल्याउने भएको छ ।
वि.सं.२०७८ असार २७ आइतवार १९:१२ मा प्रकाशित
