काठमाडौं । आर्थिक वर्ष २०७७/७८ मा सुनको मूल्यमा सामान्य वृद्धि भएको छ । एक वर्षको अवधिमा छापावाला सुनको मूल्य तोलामा ४ सय रुपैयाँले वृद्धि भएको हो ।
गत वर्षको असारमसान्तदेखि यस वर्षको असारमसान्तसम्म आईपुग्दा नेपाली बजारमा सुनको मूल्य सामान्य वृद्धि भएको नेपाल सुनचाँदी व्यवसायी महासंघले जनाएको छ ।
गत वर्षको असारमसान्तमा प्रतितोला ९२ हजार ८ सय रुपैयाँमा खरिदबिक्री भएको सुनको मूल्य यस वर्षको असारमसान्तसम्म आईपुग्दा ९३ हजार २ सय रुपैयाँ कायम भएको महासंघले जनाएको छ ।
महासंघका अनुसार यो वर्ष सुनको मूल्यले ऐतिहासिक रेकर्ड पनि कायम गरेको छ । गत वर्षको साउन २३ गते छापावाला सुनको भाउ तोलाको १ लाख ३ हजार ५ सय रुपैयाँ पुगि नयाँ रेकर्ड बनाएको थियो । यो हालसम्मकै उच्च मूल्य हो ।
गत वर्षको भदौ महिनामा पनि १ लाख रुपैयाँकै वरिपरिमा कारोबार भएको थियो । त्यसता असोज, कात्तिक महिनामा ९७ हजार रुपैयाँ वरिपरि नै कारोबार भएको थियो । लगनमा सिजन मानिने मंसिर महिनामा ९५ हजार र पुसमा ९६ हजार रुपैयाँसम्म पुगेको थियो ।
त्यसपछि सुनको मूल्य विस्तारै घट्न थाल्यो । माघमा ९२ हजार, फागुनमा ९० हजार र चैत महिनामा ८९ हजार रुपैयाँसम्म पुगेको थियो ।
महासंघका अनुसार नयाँ वर्षसगै फेरि सुनको मूल्य बढ्न थालेको थियो । बैशाखमा ९२ हजार वरिपरिसमम पुगेको सुनको भाउ जेठ महिनाका अवधिसम्म भने करिव ९५ हजार रुपैयाँसम्म पुगेको महासंघले जनाएको छ । असारमसान्तसम्म आईपुग्दा सुनको भाउ ९३ हजार २ सय रुपैयाँ कायम हुन आएको महासंघले जनाएको छ ।
यस्तै, एक वर्षको अवधिमा चाँदीको मूल्य पनि ह्वात्तै बढेको छ । गत वर्षको असारमसान्त र यस वर्षको असारमसान्तसम्म आईपुुग्दा चाँदी ३१५ रुपैयाँले वृद्धि भएको महासंघले जनाएको छ ।
गत वर्षको असारमसान्तमा चाँदी १ हजार ५ रुपैयाँ खरिदबिक्री भएको चाँदीको मूल्य यस वर्षको असारमन्तसम्म आईपुग्दा १३ सय २० रुपैयाँ कायम भएको हो ।
वि.सं.२०७८ साउन १ शुक्रवार १३:३७ मा प्रकाशित
